“İQNA”-nın “Daily Struggle”ə istinadən verdiyi xəbərə görə, Nigeriyanın tanınmış xristian keşişi Yohana Boro bir qrup xristian din xadimi ilə birlikdə müsəlman alimin məktəbinə gedərək Şeyx Osman Məhəmməd Mi-Mutanın İslam təhsilinə və cəmiyyətin inkişafına verdiyi töhfələrə görə ona təşəkkürnamə təqdim edib.

Boro bildirib ki, Şeyx Osman 50 ildən artıq müddət ərzində Nigeriyanın şimalındakı müxtəlif bölgələrdə uşaqlara və gənclərə Quran, hədis, təfsir, ərəb dili və digər İslami elmləri öyrədib.

Xristian heyətinin təqdim etdiyi məlumata əsasən, Şeyx Osman indiyədək 10 mindən çox gəncə təhsil verib. Onların bir çoxu hazırda Nigeriyanın şimalındakı müxtəlif məktəb və mərkəzlərdə ərəb dili müəllimi, İslam alimi və təhsilçi kimi fəaliyyət göstərir.

Boro bu addımın məqsədini, yaşlı olmasına baxmayaraq, Şeyx Osmanı təhsil fəaliyyətini davam etdirməyə təşviq etmək və Kaduna əyalətində müsəlmanlarla xristianlar arasındakı münasibətləri möhkəmləndirmək kimi açıqlayıb.

Şeyx Osman da xristian heyətinə təşəkkür edərək bildirib ki, bu təqdir yarım əsrdən artıq davam edən təhsil fəaliyyəti ərzində aldığı ilk mükafatdır.

O deyib: “Bu addım məndə müsəlman gənclərin təhsilini davam etdirmək üçün yeni motivasiya yaradıb.”

4370201