“İQNA”-nın "Khaleej Times"-a istinadən verdiyi məlumata görə, 29-cu Beynəlxalq Dubay Quran Mükafatı üçün 135 ölkədən 20.500 müraciət daxil olub. Bu, müsabiqənin tarixində ən böyük beynəlxalq iştirak göstəricisidir.
Bu rekord sayda müraciət, Birləşmiş Ərəb Əmirliklərinin Baş naziri və Dubayın hakimi Şeyx Məhəmməd bin Rəşid Al Məktumun himayəsi altında keçirilən 1448-ci hicri qəməri / 2027-ci miladi ili üçün qeydiyyat başa çatdıqdan sonra əldə edilib.
Bu artım, müsabiqənin "Dünyanın ən gözəl Quran tilavətinin axtarışında" şüarı ilə həyata keçirilən inkişaf vizyonu çərçivəsində tətbiq edilən dəyişikliklərdən sonra baş verib. Dəyişikliklərə ənənəvi namizədlik prosesi ilə yanaşı, şəxslərə birbaşa müraciət etmək icazəsinin verilməsi də daxildir.
Müsabiqə həmçinin tarixində ən böyük məbləğ olan 12 milyon dirhəmdən (3,3 milyon dollar) çox mükafat fondu elan edib, eləcə də kateqoriyalar, iştirakçıların şərtləri, qiymətləndirmə prosesi və iştirak mexanizmlərində dəyişikliklər edib.
Misir 6838 müraciətlə ən çox müraciət qeydə alınan ölkə olub, ondan sonra İndoneziya (1923), Pakistan (1862) və Suriya (1511) gəlir.
16 yaşdan yuxarı kişilər kateqoriyasında 14.040 müraciət daxil olub, 16 yaşa qədər oğlan və qızlar kateqoriyasında isə 2394 nəfəri qadın olmaqla 6495 müraciət qeydə alınıb.
Dubay İslam İşləri və Xeyriyyə Fəaliyyətləri Departamentinin Baş direktoru və Beynəlxalq Dubay Quran Mükafatı Qəyyumlar Şurasının sədri Əhməd Dərviş əl-Mühairi bildirib ki, bu rekord iştirak göstəricisi müsabiqənin yeni yanaşmasının və beynəlxalq miqyasda genişlənməsinin təsirini göstərir.
Yeni mükafat strukturuna əsasən, hər iki əsas kateqoriyanın qalibi 1 milyon dollar alacaq. İkinci yerin sahiblərinə 100.000 dollar, üçüncü yerin sahiblərinə isə 50.000 dollar veriləcək. "Qlobal Quran şəxsiyyəti" mükafatı da 1 milyon dollar dəyərindədir.
29-cu müsabiqənin digər bir yeniliyi, seçilmiş finalçıların Ramazan ayında Dubayın böyük məscidlərində namaz qılmağa dəvət edilməsidir. Daha sonra "Dünyanın ən gözəl Quran tilavəti"ni seçmək üçün ictimai səsvermədən istifadə olunacaq.
Müraciət edənlər hazırda təcvid, səsin keyfiyyəti, tilavət və ümumi ifa əsasında ilkin qiymətləndirmədən keçirlər. 16 yaşdan yuxarı iştirakçılar arasında birinci mərhələni uğurla keçənlər ictimai səsvermə mərhələsinə çıxacaq və seçilmiş finalçılar Ramazan ayında Dubaya dəvət olunacaqlar. Səsvermənin 8-16 fevral 2027-ci il tarixlərində keçirilməsi planlaşdırılır.
16 yaşdan kiçik iştirakçılar üçün ikinci mərhələ 1-14 sentyabr 2026-cı il tarixləri arasında canlı video-münsiflər heyəti vasitəsilə həyata keçiriləcək. Daha sonra finalçılar 8-16 fevral 2027-ci il tarixlərində ictimai səsvermə mərhələsinə daxil olacaqlar.
Müsabiqə başladığı gündən bəri 28 dövrə ərzində 123 ölkədən 7826 iştirakçı qatılıb. İlk müsabiqədən bəri proqram 67 milyon dirhəmdən çox pul mükafatı verib və "Qlobal Quran şəxsiyyəti" mükafatı çərçivəsində 24 şəxsi və 3 institutu təltif edib.
4370851
