له افغانستان سره د ا نسان دوستی مرستئ زیاتیږي
په افغانستان کې د ملګرو ملتونو د عمومي سرمنشي ځانګړې استازې «روزا اتونبایوا» ویلي چې اوسنۍ مرستې د افغانانو لپاره بسنه نه کوي او دوی هڅه کوي چې دا مرستې زیاتې کړي.
د کلید ګروپ د خبر له مخې، نوموړې د طالبانو د ریاست الوزرا له سیاسي مرستیال او د رئیس الوزرا له ځایناستي مولوي عبدالکبیر سره په لیدنه کې ویلي، د دوی معلومات ښيي چې په افغانستان کې د کوکنارو کښت کم شوی او دوی له افغان کروندګرو سره د مرستې لپاره له هند او چین څخه هم د مرستې غوښتنه کړې ده.
د طالبانو تر واک لاندې له ارګ څخه په خپره شوې خبرپاڼه کې راغلي،مولوي عبدالکبیر په دې لیدنه کې ویلي چې له افغانستان سره د نړیوال بانک او نورو نړیوالو موسسو مرستې اړینې دي او په کار ده چې نړیوال بانک په افغانستان کې خپلې نیمګړې پروژې بشپړې کړي.
مولوي کبیر له ایران سره د اوبو پر سر راپورته شویو ناندریو ته په اشارې ویلي، دوی په دې برخه کې چمتو دي چې د مخالفو لورو اندېښنې د خبرو له لارې حل کړي.
