په پاکستان او بنگله دېش کې د فلسطینیانو په ملاتړمیلیونی لاریونونه وشول
د ایکنانیوز پښتو څانګې خبریال راپور راکړ، د پاکستان په کراچۍ کې د جماعت اسلامی ، جمعیت علمای اسلام ف څانګې ،مجلس وحدت مسلمین، تحریک اسلامی پشمول یو شمیر مذهبی ګوندونو او ډلو ټپلو له خوا د غزې تړانګې او فلسطین د مظلوم ولس په ملاتړ کې او د وحشي صهیونیسټي رژيم په ضد میلیوني لاریونونه ترسره شول . همداراز د بنګله دېش پلازمینې ډاکې په سهرووردي پارک کې هم د فلسطینیانو په ملاتړ او په غزه کې د اسراییلو د روانو ظلمونو پر ضد پراخه لاریون ترسره شو.
د بهرنیو خبري اژانسونو په حواله، په دې لاریون کې په لسګونو لکه خلکو ګډون کړی و.
په پاکستان او بنګله دیش کې پاریدلو خلکو چې د فلسطین بیرغونه یې په لاس کې نیولي وو، د غزې په تړانګه یې د اسراییلو د وحشتونو پای ته د رسولو غوښتنه وکړه. او دغه راز ئې پر درست اسلامی امت غږ وکړ چې د اسرآئيلي او د اسرائيلو د ملاتړو د محصولاتو او تولیداتو دې فورا بایکاټ وکړي او خپلې پیسې دې د فلسطینیو ماشومانو او میرمنو په نسل وژنې کې نه خرڅ کوي او ددې په ځاي دې د فلسطین له مظلوم ولس سره د مرستې لپاره کمپاین وچلوي.
همداراز وروستی راپورونه ښئ چې تیریګرو اسرائيلي پوځيانو د غزې په رفح سیمې په دواامدارو تیریو او جنایتونو سره دغه سیمه نیولې او دا یې د امنیتي زون په توګه اعلان کړې، چې له امله یې دغه سیمه کلابنده شوې او رفح د غزې له تړانګې څخه جلا کړی شوې ده.
د راپورونو له مخې، په خان یونس، المواسي کمپ، شجاعیه او بیت لاهیا باندې د اسراییلو د دوامداره بمباریو په پایله کې تېره ورځ له ۲۰ څخه زیات فلسطینیان شهیدان شوي دي.
