په الکفیل میوزیم کې د قرآني رول لرونکې فلزي ټوټې ساتنه

ایکنا- په  کربلا  کې د حضرت عباس علمدار (ع) سپېڅلي حرم اړوند د الکفیل میوزیم د خپل تاریخي میراث په مینځ کې  د برونزو یوه فلزي ټوټه، چې د قرآني آیتونو نقش پرې شوی، ساتلې او ثبت کړې ده.

یکنانیوز د الکفیل خبری چینل د راپور له مخې، د عباسي سپېڅلي حرم د خزانو  او خطي نسخو میوزیم یوه فلزي ټوټه په خپلو اثارو کې ثبت کړې ده. دا اثر له برونزو څخه جوړ شوی فلزي لاس دی چې د قرآني آیتونو په نقشونو سینګار شوی او د فلزکارۍ د هنر سمبولیک اړخ څرګندوي.

دغه ټوټه ۱۲ سانتي‌میتره اوږدوالی، ۹.۵ سانتي‌میتره پلنوالی او ۱۰۳ ګرامه وزن لري. همدارنګه پرې د ۱۲۲۱ هجري قمري کال نېټه حک شوې ده، چې د دې تاریخي اهمیت او د فلزي سینګار د هنر له یوې ځانګړې دورې سره ئې تړاو څرګندوي.

دا ټوټه د  لاس  د ګوتو  او ورغوي بڼه لري،  چې هندسي نقشونه او خوشخطۍ پرې کښل شوې دي. پرې لیکل شوي عبارتونه دا دي: «ید الله فوق ایدیهم، یا محمد، سنه ۱۲۲۱، یا علي». همدارنګه د څوارلسو معصومینو(ع) نومونه د ګوتو او د لاس پر  وَرغوي حک شوي دي. د ټوټې په بل اړخ کې آیت‌الکرسي د ګوتو او د لاس د  وَرغَوي په اوږدو کې لیکل شوې ده، چې معنوي او ښکلائي اړخونه په ځان کې رانغاړي.

دغه اثر هغه دقت او ظرافت څرګندوي چې پخوانیو هنرمندانو فلزکارۍ ته ځانګړی کړی و، او د تزئیني سټایلونو ډولوالی  او مهارت ښکاره کوي.

همدارنګه دا قرآني اثر د فلزکارۍ د صنعت په ساتنې او راتلونکو نسلونو ته د هغې په لېږد کې مرسته کوي، ځکه دا صنعت د کلتوري هویت نه بېلېدونکې برخه ګڼل کېږي.

https://iqna.ir/fa/news/4351126