آزادی اظہار کے نام پر کسی کو مقدس ہستیوں کی توہین کی اجازت نہیں دی جاسکتی، علامہ عارف واحدی
ایکنا نیوز- اسلام ٹائمز۔ شیعہ علماء کونسل پاکستان نے گستاخانہ خاکوں کے مقابلوں کی شدید الفاظ میں مذمت کرتے ہوئے اسے انتہاء پسندی کی انتہاء قرار دیدیا، مرکزی سیکرٹری جنرل علامہ عارف حسین واحدی نے کہا ہے کہ آج حقوق بشیریت کے نام لینے والوں کی زبانیں کیوں گنگ ہوگئی ہیں، آزادی اظہار کے نام پر کسی کو مقدس ہستیوں کی توہین کی اجازت نہیں دی جاسکتی، اقوام متحدہ کیوں خاموش ہے، او آئی سی کو بھی اب جاگنا ہوگا۔
ان خیالات کا اظہار انہوں نے امریکہ میں گستاخانہ خاکوں کے مقابلے پر اپنے سخت ردعمل میں کیا۔ علامہ عارف حسین واحدی نے کہا کہ آزادی اظہار کا مطلب یہ نہیں کہ مقدس ہستیوں کی توہین کی جائے۔ اسلام رواداری، محبت اور حسن سلوک کا درس دیتا ہے، جبکہ تمام انبیاء کا احترام مسلمانوں پر واجب ہے لیکن دوسری طرف مغرب میں ایک عرصہ سے قبیح اور گمراہ کن مہم چلائی جا رہی ہے۔
علامہ عارف واحدی کا مزید کہنا تھا کہ کسی کو آزادی اظہار کے نام پر مقدس ہستیوں کی توہین کی اجازت نہیں دی جاسکتی ہے۔ بات بات پر انسانی حقوق کی بات کرنیوالی نام نہاد حقوق بشریت کی تنظیموں کی زبانیں آج کیوں گنگ ہوگئی ہیں، کیا یہ کھلم کھلا انسانی حقوق کی خلاف ورزی نہیں، اس اقدام نے ایک مرتبہ پھر مسلم امہ کے دل چھلنی کر دیئے ہیں، اقوام متحدہ کی خاموشی بھی افسوسناک ہے۔ انہوں نے کہا کہ ہم مطالبہ کرتے ہیں اس معاملے پر فی الفور اقوام متحدہ میں قانون سازی کی جائے اور مسلم دنیا کے حکمران اب خواب غفلت سے بیدار ہوں اور مقدس ہستیوں کے احترام کے حوالے سے عالمی سطح پر قانون سازی کیلئے کردار ادا کریں جبکہ او آئی سی کو بھی اب خواب غفلت سے بیدار ہونا ہوگا۔
