شجاع خانزادہ کی شہادت ناقابل تلافی نقصان ہے: علامہ ناصر عباس جعفری
ایکنا نیوز- شفقنا- علامہ راجا ناصر کا کہناتھا کہ پنجاب میں دہشت گردی کے بہت سارے مراکز ابھی تک دہشت گردوں کی محفوظ پناہ گاہوں کی شکل میں موجود ہیں۔ وفاقی دارالحکومت اور پنجاب کے ان مدارس کا بھی آپریش کیا جانا چاہیے جہاں طالبانی فکر کا نصاب پڑھایا جاتا ہے۔جو بھی شخص دہشت گردوں کو ہیرو بنا کر پیش کرتا ہے اسے نیشنل ایکشن پلان کے تحت گرفتارکیا جانا چاہیے، شجاع خانزادہ کی شہادت ملک و قوم کے لیے ایک ناقابل تلافی نقصان ہے۔ ان سے کالعدم دہشت گرد تنظیم لشکر جھنگوی کے سربراہ ملک اسحاق کی ہلاکت کا بدلہ لیا گیا ہے، افواج پاکستان اور حکومت دہشت گردی کے خاتمے میں پرعزم ہے۔اس طرح کی بزدلانہ کاروائیاں مذموم عناصر کی سرکوبی کی راہ میں رکاوٹ نہیں بن سکتیں۔ علامہ راجہ ناصر نے اس سانحہ پرمجلس وحدت مسلمین کی طرف سے ایک روزہ سوگ کا اعلان کرتے ہوئے شجاع خانزادہ سمیت دیگر شہدا کے خاندانوں سے اظہار تعزیت کرتے ہوئے مرحومین کی بلندی درجات اور لواحقین کے لیے صبر جمیل کی دعا کی ہے۔
