عراق: داعش کا سرغنہ ابوبکر البغدادی زخمی اور اس گروہ کے پچیس دہشت گرد ہلاک
ایکنانیوز- سحر ٹی وی- عراق کی مشترکہ آپریشنل کمان کے ترجمان نے کہا ہے کہ اتوار کے دن عراقی فضائیہ کے لڑاکا طیاروں کے حملے میں دہشت گرد گروہ داعش کا سرغنہ ابوبکر البغدادی زخمی ہوگیا ہے جسے ایک گاڑی کے ذریعے نامعلوم مقام پر منتقل کر دیا گیا ہے۔
عراق کی وزارت داخلہ نے بھی ایک بیان جاری کیا ہے جس میں آیا ہے کہ دہشت گرد گروہ داعش کے گرفتار ہونے والے ایک سرغنے نے ابوبکر البغدادی کے قافلے کے بارے میں معلومات فراہم کی تھیں جس کے بعد اس قافلے پر حملہ کیا گیا۔ عراقی فوج کی خفیہ ایجنسی الصقور نے بھی کہا ہے کہ اتوار کے دن عراقی فضائیہ کے لڑاکا طیاروں کی بمباری میں دہشت گرد گروہ داعش کے پچیس عناصر ہلاک ہوگئے۔
واضح رہے کہ عراقی فضائیہ کے لڑاکا طیاروں نے اتوار کے دن صوبہ الانبار کے مغرب میں واقع الکرابلہ کے علاقے میں دہشت گرد گروہ داعش کے سرغنے ابوبکر البغدادی کے قافلے پر بمباری کی تھی۔
