پیرس سرچ آپریشن: ’خودکش بمبار خاتون نہیں مرد‘
ایکنانیوز- ڈان نیوز کے مطابق فرانسیسی حکام کا کہنا ہے کہ پیرس حملے کے ماسٹر مائنڈ عبد الحامد اباعود کی تلاش کے لیے پیرس کے مضافاتی علاقے میں کیے گئے آپریشن کے دوران خود کو بم سے خاتون نے نہیں بلکہ مرد نے اڑایا۔
اس سے قبل فرانسیسی حکام کی جانب سے کہا گیا تھا کہ پیرس کے مضافاتی علاقے سینٹ ڈینس میں گھنٹوں تک جاری رہنے والے آپریشن کے دوران پیرس حملوں کے ماسٹر مائنڈ کی 26 سالہ کزن حسنہ آیت بوالحسن نے خود کو دھماکے سے اڑا لیا۔
تاہم اب برطانوی نشریاتی ادارے ’بی بی سی‘ کی رپورٹ میں فرانسیسی تفتیش کاروں کے حوالے سے بتایا گیا کہ حسنہ کی بجائے خودکش بمبار ایک مرد تھا۔
واضح رہے کہ گزشتہ ہفتے پیرس میں ہولناک حملوں کا ماسٹر مائنڈ مراکشی نژاد بیلجیئن شدت پسند عبدالحامد اباعود کو بتایا گیا تھا، جسے اسی سرچ آپریشن کے دوران ہلاک کیا گیا تھا۔
حملہ آوروں کا طرز زندگی اسلام کے منافی
پیرس حملوں میں ملوث دہشت گردوں کی شناخت کے بعد ان کی نجی زندگی کے بارے میں بھی حیرت انگیز انکشافات ہو رہے ہیں۔
حملہ آوروں کا طرز زندگی دیکھا جائے تو وہ اسلامی تعلیمات کے بالکل منافی تھا۔
برطانوی اخبار دی گارڈین کی رپورٹ کے مطابق خاتون دہشت گرد حسنہ کے دوستوں، پڑوسیوں اور رشتہ داروں کا کہنا ہے کہ وہ سیلفیاں لینے اور پارٹیوں میں جانے کی شوقین تھی، جبکہ وہ شراب اور سگریٹ نوشی بھی کرتی تھی۔
حسنہ کے بھائی کا کہنا ہے کہ اس کی بہن کو مذہب سے کوئی دلچسپی نہیں تھی اور نہ ہی اس نے کبھی قرآن پڑھا تھا۔
تاہم پھر 6 ماہ قبل اچانک اس کی سوچ میں تبدیلی آگئی اور اس نے اپنا طرز زندگی بدل دیا۔
حسنہ کی والدہ کا کہنا ہے کہ شدت پسندوں نے اس کی سوچ کو بالکل تبدیل کردیا تھا جس میں اس کے کزن عبد الحامد اباعود کا بھی اہم کردار تھا۔
