پاراچنار، قائد شہید کی 28ویں برسی

بین الاقوامی گروپ:برسی میں شرکت کرنے کی غرض سے ایم ڈبلیو ایم کے مرکزی قائدین پر مشتمل ایک قافلہ خیبر پختونخوا کے آرگنائزر علامہ اقبال حسین بہشتی کی قیادت میں پاراچنار پہنچ چکا ہے، جبکہ اعلٰی سطحی قیادت پر مشتمل انکا دوسرا قافلہ بھی عنقریب پاراچنار پہنچنے والا ہے

ایکنانیوز- اسلام ٹایمز-آج 21 اگست کو پاراچنار سٹی میں تحریک حسینی کے زیر اہتمام شہید ملت جعفریہ علامہ سید عارف حسین الحسینی کی اٹھائیسویں برسی منعقد ہو رہی ہے، مگر معمول کے خلاف اس سال یہ برسی قائد شہید کے مزار کی بجائے مدرسہ آیۃ اللہ خامنہ ای پاراچنار میں منعقد ہو رہی ہے۔ اس حوالے سے کرم ایجنسی کے قصبہ قصبہ، گاؤں گاؤں خصوصاً پاراچنار شہر کو پوسٹرز اور شہید قائد کی تصاویر سے مزین کیا جاچکا ہے۔ تاہم برسی کو ناکام بنانے کے لئے ایک ہفتے سے مختلف قسم کے پراپیگنڈوں کا سہارا لیا گیا۔ اس دوران خودکش اور مسلح گاڑیوں کے داخلے کی افواہیں پھیلا کر پاراچنار شہر میں گاڑیوں کا داخلہ ممنوع قرار دیا گیا۔ لوگ شہر سے باہر کافی دور اپنی یا کرایہ کی گاڑیوں سے اتر کر پیدل شہر کی طرف جانے پر مجبور تھے۔ ان تمام روکاوٹوں کے باوجود الحمد للہ آج شہید حسینی کی اٹھائیسویں برسی نہایت جوش و جذبے کے ساتھ منائی جا رہی ہے۔ برسی میں شرکت کرنے کی غرض سے ایم ڈبلیو ایم کے مرکزی قائدین پر مشتمل ایک قافلہ خیبر پختونخوا کے آرگنائزر علامہ اقبال حسین بہشتی کی قیادت میں پاراچنار پہنچ چکا ہے۔ جبکہ اعلٰی سطحی قیادت پر مشتمل انکا دوسرا قافلہ بھی عنقریب پاراچنار پہنچنے والا ہے۔ برسی کے پروگرام سے اب تک تحریک حسینی اور ایم ڈبلیو ایم کے کئی قائدین خطاب کرچکے ہیں۔ جن میں شبیر ساجدی، مولانا منیر حسین جعفری، قائم مقام صدر ثاقب حسین بنگش، مولانا صداقت حسین، ایم ڈبلیو ایم کے مرکزی رہنما علامہ اقبال بہشتی وغیرہ قابل ذکر ہیں۔