غزہ واقعے پر پاکستانی کرکٹرز کا فلسطین سے اظہار یکجہتی، جھنڈے پوسٹ کر دیے
اسرائیل کی جانب سے غزہ میں وحشیانہ بمباری جاری ہے، منگل کو صیہونی افواج کے اسپتال پر ہونے والے تازہ حملے میں 500 سے زائد فلسطینی شہید ہوگئے جس کے بعد غزہ پر اسرائیل کے حملوں میں شہید فلسطینیوں کی تعداد 3500 سے زیادہ ہوگئی ہے۔
فسلطینی وزارت صحت کے مطابق غزہ میں اسرائیلی حملوں سے 12 ہزار 500 افراد زخمی ہوئے ہیں، شہید ہونے والوں میں 1000 سے زائد بچے اور ہزار سے زائد خواتین شامل ہیں۔
قومی کرکٹ ٹیم جو ان دنوں بھارت میں آئی سی سی ورلڈکپ کھیلنے میں مصروف ہیں، بدھ کو پہلے پاکستان کرکٹ ٹیم کے آل راؤنڈر شاداب خان، محمد نواز اور اسامہ میر نے فلسطینی عوام سے اظہار یکجہتی کرتے ہوئے ایکس( سابقہ ٹوئٹر) پر فلسطین کے جھنڈے کی تصویر پوسٹ کی۔
محمد نواز نے فلسطین کے جھنڈے کے ساتھ ہاتھ اٹھائے دعا والے ایموجی بھی پوسٹ کیے۔
بعد ازاں اوپنر امام الحق،حارث رؤف اور افتخاراحمد نے بھی فلسطین کا جھنڈا سوشل میڈیا پر پوسٹ کیا۔
واضح رہے کہ اس سے قبل پاکستان کرکٹ ٹیم کے وکٹ کیپر بیٹر محمد رضوان نے ورلڈکپ میں سری لنکا کے خلاف شاندار جیت فلسطینیوں کے نام کی تھی جو کہ بھارتیوں اور اسرائیل کو بالکل پسند نہیں آئی تھی۔
رضوان کا جیت غزہ کے بہن بھائیوں کےنام کرنا بھارتی اسپورٹس جرنلسٹ وکرانت گپتا کو بالکل نہ بھایا اور انہوں نے آئی سی سی سے سوال کردیا۔
