دنیا کے سینکڑوں ممالک اور شھروں میں غزہ کے حق میں مظاہرے
ایکنا- عربی 21 نیوز کے مطابق، انگلینڈ میں فلسطین یکجہتی مہم کے ڈائریکٹر بن جمال نے 17 فروری کو غزہ کے لیے دوسرے عالمی دن کے طور پر منانے کا اعلان کیا۔
لندن میں اسرائیل کے قبضے کے خلاف احتجاج کے دوران بن جمال نے کہا کہ 17 فروری غزہ کی پٹی کے لیے دوسرا بین الاقوامی "یومِ عمل" ہوگا۔
انہوں نے مزید کہا: لوگ فلسطین کے ساتھ اظہار یکجہتی اور جنگ بندی کی درخواست کرنے کے لیے مقررہ دن 100 سے زائد برطانوی شہروں اور 60 کے قریب ممالک میں مارچ کریں گے۔
دریں اثنا، 7 اکتوبر سے غزہ کی پٹی پر صیہونی حکومت کی مسلسل جارحیت کے خلاف دنیا کے کئی دارالحکومتوں میں فلسطینی عوام کی حمایت میں مظاہرے اور تقریبات جاری ہیں۔
یہ بات قابل غور ہے کہ غزہ کے لیے پہلا بین الاقوامی دن 13 جنوری کو منعقد ہوا اور اس میں برطانیہ کے 120 سے زائد شہروں اور 45 ممالک میں بڑے پیمانے پر مظاہرے ہوئے تھے۔
اس وقت فلسطین کی حامی عالمی تحریک نے غزہ کی پٹی میں جنگ بندی اور صیہونی حکومت کے اس علاقے کا محاصرہ ختم کرنے کا مطالبہ کیا تھا۔
اسرائیل کی غاصب حکومت مسلسل 122ویں روز بھی غزہ کی پٹی کے عوام کے خلاف جاری نسل کشی کے ایک حصے کے طور پر رہائشی مکانات اور طبی اور میڈیا ٹیموں کو نشانہ بنا رہی ہے۔
غزہ کی پٹی کے عوام مسلسل جارحیت اور پرتشدد اور اندھا دھند بمباری کے سائے میں ایک بے مثال انسانی تباہی سے دوچار ہیں اور غزہ کی پٹی کے اندر 1.9 ملین سے زیادہ لوگ بے گھر ہو چکے ہیں اور مناسب سہولیات کے بغیر کیمپوں میں پناہ لیے ہوئے ہیں۔
غزہ کی پٹی پر مسلسل جارحیت کے نتیجے میں شہید ہونے والوں کی تعداد 27 ہزار سے تجاوز کر گئی ہے اور مختلف زخمیوں کی تعداد 66 ہزار سے تجاوز کر گئی ہے۔ اس کے علاوہ ہزاروں افراد ملبے تلے دب گئے اور عمارتیں اور انفراسٹرکچر بڑے پیمانے پر تباہ ہوچکے ہیں۔/
4198200
