مصری قراء : استاد عبایی قرآنی قضاوت میں ایک شاہکار تھے

ایکنا: بعض معروف مصری قراء نے استاد عبائی کی وفات پر تعزیتی پیغامات میں ان کو بے مثال قرآنی قاضی قرار دیا ہے۔

ایکنا کے مطابق، مصر کے ممتاز قاریوں اور ججز، جن میں شیخ عبدالفتاح الطاروطی، شیخ احمد فرج اللہ الشاذلی، طہ محمد عبدالوہاب، شیخ محمد علی جابین اور شیخ عبداللہ عبداللہ شامل ہیں، نے اپنے علیحدہ علیحدہ تعزیتی پیغامات میں استاد عبدالرسول عبایی کے انتقال پر ایرانی قوم، قرآنی حلقے اور ان کے خاندان سے تعزیت کا اظہار کیا۔

احمد فرج اللہ الشاذلی (قاری مصری) کا تعزیتی پیغام:

"جناب استاد عبدالرسول عبایی ایک دلسوز انسان اور مہربان باپ تھے۔ جب آپ پہلی بار ان سے ملتے، یوں لگتا جیسے برسوں سے جانتے ہوں۔ میں نے ان کو ایک مہربان، سخی، خوش اخلاق، نورانی چہرہ رکھنے والے، نصیحت آموز، دیانتدار اور ہر دلعزیز شخصیت پایا۔ ان کی روح مہربان اور محبوب تھی۔ قرائت قرآن، درست تلفظ اور احکام تجوید کے ماہر اور ایک ایسے پیشکسوت استاد تھے جن کی مثال کم ہی ملے گی۔ ان کا فقدان ناقابل تلافی ہے اور وقت شاذونادر ہی ان جیسا صاحب اخلاق و ادبیات استاد پیدا کرتا ہے۔

میں اس غم انگیز سانحہ پر ایرانی قوم کو دل کی گہرائیوں سے تعزیت پیش کرتا ہوں اور بارگاہ الٰہی سے ان کے لیے مغفرت و رحمت واسعہ، اور ہم سب کے لیے صبر و اجر عظیم کا طلبگار ہوں۔ دعا ہے کہ خداوند کریم انہیں انبیاء، صدیقین، شہداء اور صالحین کے ساتھ محشور فرمائے۔ "بے شک ہم اللہ کے لیے ہیں اور اسی کی طرف لوٹ کر جانے والے ہیں۔" خداوند ہمارے آقا حضرت محمد (ص) اور ان کے اہل بیت و اصحاب پر اپنی رحمت نازل فرمائے۔ یا رب العالمین۔"

 

ڈاکٹر عبدالفتاح الطاروطی (قاری مصری) کا تعزیتی پیغام:

السلام علیکم و رحمۃ اللہ و برکاته بسم اللہ الرحمن الرحیم "اور صبر کرنے والوں کو خوشخبری دے، جو مصیبت آنے پر کہتے ہیں: بے شک ہم اللہ کے لیے ہیں اور اسی کی طرف لوٹ کر جانے والے ہیں۔ یہی وہ لوگ ہیں جن پر ان کے رب کی طرف سے درود و رحمت ہے اور وہی ہدایت یافتہ ہیں۔"

میں مصر کے تمام قرآنی خاندان کی جانب سے استاد عبدالرسول عبایی (رحمت اللہ علیہ) کے انتقال پر خود کو اور اسلامی جمہوریہ ایران کو تعزیت پیش کرتا ہوں۔

استاد عبایی ہمارے محبوب اور محترم استاد تھے، جن کے ساتھ قرآن کریم کی محافل اور مقابلوں میں قیمتی تجربات حاصل کیے۔ وہ ایک عظیم باپ، عظیم استاد اور عزیز دوست تھے۔ اللہ تعالیٰ ان کی قرآنی خدمات کے بدلے انہیں رحمت عطا فرمائے، انہیں صالحین کے ساتھ رکھے، ان کے اہل خانہ کو بہترین جزا دے، ہمارے دلوں کو صبر عطا فرمائے اور انہیں جنت الفردوس میں مقام عطا کرے۔

 

شیخ محمد علی جابین (مبتهل مصری) کا تعزیتی پیغام:

"ہم استاد عبدالرسول عبایی کی رحلت پر خود کو اور تمام قرآنی خاندان کو تعزیت پیش کرتے ہیں۔ انہوں نے اپنی زندگی قرآن مجید کی خدمت اور اس کی تعلیم و ترویج میں صرف کر دی۔ ایک قاری قرآن کا دنیا سے جانا بہت بڑی محرومی ہے اور ہمارا غم اس اثر کے سبب ہے جو استاد عبایی نے ایران کے موجودہ قاریوں کی نسل پر چھوڑا ہے۔ إِنَّا لِلَّهِ وَإِنَّا إِلَيْهِ رَاجِعُونَ۔

 

ڈاکٹر طہ عبدالوہاب (مصری جج اور موسیقی کے ماہر) کا تعزیتی پیغام:

إِنَّا لِلَّهِ وَإِنَّا إِلَيْهِ رَاجِعُونَ

امت مسلمہ ایک عظیم قرآنی عالم، استاد عبدالرسول عبایی (رحمۃ اللہ علیہ) سے محروم ہو گئی ہے۔ میں ان تمام دوستوں اور بین الاقوامی مقابلوں کے ججوں کو دلی تعزیت پیش کرتا ہوں جنہوں نے ان کی رہنمائی میں نہ صرف قرآنی فہم حاصل کیا بلکہ ادب اور داوری کے نئے انداز بھی سیکھے۔

میں اس مصیبت پر ان کے تمام چاہنے والوں کو تعزیت دیتا ہوں اور بارگاہ خداوندی سے دعا گو ہوں کہ وہ انہیں انبیاء، صدیقین اور شہداء میں شامل فرمائے اور وہ قرآن، جس کے لیے انہوں نے اپنی عمر وقف کی، ان کا شفیع بنے۔

 

شیخ عبداللہ عبداللہ (قاری مصری) کا تعزیتی پیغام:

بِسْمِ اللّٰہِ الرَّحْمٰنِ الرَّحِیْمِ

اور بشارت ہو ان صبر کرنے والوں کو جو مصیبت کے وقت کہتے ہیں: "ہم اللہ کے ہیں اور اسی کی طرف واپس جائیں گے۔"

اس غمناک لمحے میں، ہم استاد عبدالرسول عبایی، ایک عالم، ادیب اور قرآن کریم کے خادم قاری کے انتقال پر خود کو اور تمام اہل قرآن کو تعزیت پیش کرتے ہیں۔/

4276159