ABŞ-da məscidlərin açıq qapı milli günü keçiriləcək
“İQNA”-nın Amerika‑İslam Əlaqələri Şurasına istinadən verdiyi məlumata görə, ABŞ‑ın bütün məscidlərindən xahiş olunub ki, 3 may 2026-cı il tarixində qapılarını qeyri‑müsəlman ziyarətçilərin üzünə açsınlar.
Amerika‑İslam Əlaqələri Şurası (CAIR) çərşənbə günü Amerika Müsəlmanları Şurası (USCMO) ilə birlikdə məscidlərin bu təşəbbüsə qoşulmasını təşviq etmək məqsədilə tədbirə rəsmi şəkildə qatılıb.
Milli Açıq Məscid Günündə iştirak etmək istəyən məscidlər və İslam mərkəzləri CAIR-in vebsaytında yerləşdirilmiş formanı doldura bilərlər. Məscidlər həmçinin USCMO-nun Açıq Məscid Günü üçün hazırladığı planlaşdırma bələdçisindən də istifadə edə bilərlər.
ABŞ-ın müxtəlif ştatlarında bu təşəbbüsə qoşulan məscidlər və İslam mərkəzləri bütün dinlərdən və müxtəlif mənşələrdən olan qonşularını müsəlmanların ibadət məkanlarını ziyarət etməyə, müsəlman qonşuları ilə tanış olmağa və dinlərarası dialoqa qatılmağa dəvət edəcəklər.
Bu il Açıq Məscid Gününün şüarı “Bir millət, bir Tanrı” olaraq müəyyən edilib və siyasi çətinliklər, qarışıqlıqlar və nifrətin artdığı bir dövrdə ortaq dəyərlərə əsaslanan milli birliyin əhəmiyyətini vurğulayır.
USCMO-nun baş katibi Osama Camal bəyanatında bildirib: “Biz ölkə üzrə bütün məscidləri və İslam mərkəzlərini bu gözəl və çox zəruri təşəbbüsə qoşulmağa çağırırıq. İnamımız bizə öyrədib ki, hər kəsi məscidlərimizə dəvət edək və qonşularımıza dəyər verək. Biz bütün icma üzvlərini məscidləri ziyarət etməyə və müsəlman qonşuları ilə tanış olmağa dəvət edirik.”
O əlavə edib: “Bu ilki ‘Bir millət, bir Tanrı’ şüarı Amerika müsəlman icmasının mühüm rolunu və ölkəmizdə digər icmalarla əlaqəsini vurğulayır. Cəmiyyətimizdə nifrət və parçalanma toxumu səpmək cəhdləri heç vaxt uğur qazanmayacaq; yetər ki, bütün dinlərdən olan amerikalılar bir araya gəlsin və ədalət və xidmət kimi ortaq dəyərlərə diqqət yetirsinlər.”
4346545
