Wito wa tarjuma ya Tafsiri ya Tasnim ili kupanua ufahamu wa Qur’ani duniani
Katika mkutano uliofanyika hivi karibuni jijini Bangkok, Thailand, Mahdi Zare, mshauri wa kitamaduni wa Iran, alisifu Tafsiri ya Tasnim, tafsiri pana ya Qur’ani iliyotungwa na Ayatullah Abdollah Javadi Amoli.
Akizungumza na hadhira iliyojumuisha wasomi na wapenzi wa masomo ya Kiislamu, Zare alielezea tafsiri hiyo kuwa "kazi kubwa ya kielimu inayochunguza hekima ya Mwenyezi Mungu iliyo katika Qur’ani Tukufu kwa undani zaidi."
Tafsiri ya Tasnim, ambayo inajumuisha juzuu 80, ilikamilika kwa kipindi cha miaka 40, kuanzia 1980 hadi 2020. Inatambulika kama tafsiri yenye maelezo ya kina zaidi katika historia ya Kiislamu.
Kazi hiyo inatumia mbinu za pande tatu, ikichanganya tafsiri ya Qur’ani kwa Qur’ani yenyewe, kwa marejeo ya Hadithi, na kupitia mantiki ya kiakili.
Zare alisisitiza kina cha kipekee cha tafsiri hiyo, akibainisha kwamba haielezi tu vipengele vya kilugha na kifasihi vya Qur’ani, bali pia inachunguza vipengele vya kifalsafa, kimaadili, kijamii, kitasaufi, na hata vya kisayansi. “Mbinu hii pana inakidhi mahitaji ya kiroho na kiakili ya binadamu wa kisasa,” Zare alisema.
Alibainisha kwamba Qur’ani ni chanzo cha mwongozo wa kimataifa, chenye tabaka za kina za maarifa ya kiungu. “Kwa karne nyingi, wasomi wa Kiislamu wamejitahidi kufasiri mafundisho ya Qur’ani kwa njia inayowafikia watu wa nyakati na tamaduni tofauti. Tafsiri ya Tasnim inasimama kama mwanga wa mwongozo kwa wale wanaotafuta uwazi wa kiroho na kiakili katika dunia ya leo iliyojaa changamoto."
Sifa mojawapo ya kipekee ya tafsiri hiyo, mjumbe huyo alibainisha, ni mbinu yake ya Qur’ani-kwa-Qur’ani, ambapo maana ya aya zinafafanuliwa kupitia sehemu nyingine za Qur'ani. Mbinu hii, Zare alieleza, inaonesha maelewano na mshikamano wa ndani wa Qur’ani. “Inadhihirisha uhusiano wa kimungu wa ufunuo, ikiwasaidia wasomaji kufahamu hekima ya kina ya Qur’ani.”
Ayatullah Javadi Amoli, mwandishi wa tafsiri hiyo, alikusudia kufanya mafundisho ya Qur’ani kufikika na kuwa muhimu kwa changamoto za jamii ya kisasa, alisema mjumbe huyo, na kuongeza kwamba maarifa ya msomi huyo yanatoa suluhisho la kivitendo kwa masuala ya kisasa, na kutoa mfumo wa kimaadili na kiroho unaokidhi mahitaji ya binadamu.
Zare pia aligusia umuhimu wa kutafsiri tafsiri hiyo katika lugha mbalimbali ili iweze kupatikana kwa urahisi zaidi.
“Tafsiri ya Tasnim si kazi ya kiteolojia tu; ni hazina ya maarifa ya Kiislamu ambayo inaweza kuwa msingi wa kukuza utambulisho wa Kiislamu na maendeleo ya kimaadili katika jamii ya kimataifa."
Mnamo 2006, Shirika la Elimu, Sayansi, na Utamaduni la Ulimwengu wa Kiislamu (ISESCO) lilitambua Tafsiri ya Tasnim kama kazi ya kihistoria katika masomo ya Qur’ani na Uislamu. Wasomi wameisifu kwa usomi wake wa kina na uwezo wake wa kuhamasisha tafakuri ya kimaadili na ukuaji wa kiroho.
4260326
