Washairi kutoka nchi 25 washiriki Tamasha la Kimataifa la “Mtume wa Rehema”

IQNA – Washairi kutoka nchi 25 wamewasilisha takriban mashairi 1,500 katika Tamasha la Kimataifa la Ushairi la “Mtume wa Rehema,” lilioandaliwa kwa heshima ya kutimia miaka 1500 tangu kuzaliwa kwa Mtume Muhammad (SAW).

Hossein Divsalar, Naibu wa Maendeleo ya Ushirikiano wa Kisayansi na Kitamaduni katika Shirika la Utamaduni na Mahusiano ya Kiislamu (ICRO), alitangaza kuwa tamasha hilo limepokea mashairi kutoka ulimwengu wa Kiislamu na hata nje yake.

Akizungumza katika mkutano na waandishi wa habari, alisema kuwa tamasha hilo limeandaliwa kwa ushirikiano kati ya ICRO, Taasisi ya Ibrahim ya Kuwait, Wizara ya Mambo ya Nje ya Iran, Ubalozi wa Iran nchini Kuwait, Serikali ya Mkoa wa Isfahan, na Chuo Kikuu cha Kiislamu cha Azad tawi la Isfahan (Khorasgan).

Kwa mujibu wa Divsalar, Jumuiya ya Ushirikiano wa Kiislamu (OIC) imetangaza mwaka huu kuwa “Mwaka wa Mtume wa Rehema” kufuatia pendekezo la Iran. “Tamasha hili linakusudia kuenzi mafunzo ya kimaadili na kibinadamu ya Mtume Muhammad (SAW) na kuangazia nafasi yake kama mjumbe wa amani,” alieleza.

Mashindano hayo yalifanyika kwa lugha ya Kiarabu na Kifarsi. Washairi kutoka Iran, Kuwait, Iraq, Tajikistan, Oman, Saudi Arabia, Yemen, Qatar, UAE, Bahrain, Syria, Lebanon, Jordan, Misri, Palestina, Libya, Tunisia, Algeria, Nigeria, Uturuki, Sweden, Bangladesh, Afghanistan, India, na Pakistan walishiriki kwa kuwasilisha kazi zao.

Kaulimbiu kuu za mashairi ni pamoja na: “Tabia na Maadili ya Mtume,” “Mtume kama Rehema kwa Walimwengu,” “Amani na Haki katika Sunna ya Mtume,” “Mwongozo kwa Ubinadamu,” “Umoja wa Kiislamu,” “Kutetea Wanyonge,” na “Haki katika Urithi wa Mtume.”

Divsalar alieleza kuwa washairi 12, sita wa Kifarsi na sita wa Kiarabu—watachaguliwa kama washindi.

Sherehe ya kufunga tamasha itafanyika Jumatatu, Novemba 10, katika Chuo Kikuu cha Kiislamu cha Azad, Isfahan.

Vitabu viwili vya mashairi, kimoja cha Kifarsi na kingine cha Kiarabu, vitazinduliwa rasmi katika hafla hiyo.

Katibu wa kisayansi wa tamasha hilo, Alireza Qazveh, alielezea mashairi yaliyowasilishwa kuwa ya “kiwango cha juu,” akibainisha kuwa mashairi 900 ya Kifarsi yalipokelewa, na zaidi ya nusu yake yanafaa kuchapishwa. “Matokeo ni ya kuvutia kiasi kwamba tumeamua kuyakusanya katika vitabu viwili, ukurasa 250 kwa Kifarsi na ukurasa 350 kwa Kiarabu,” alisema.

Aliongeza kuwa washairi waliobobea na chipukizi walishiriki, ambapo mashairi mengi ya Kiarabu yaliandikwa kwa mtindo wa qasida, na yale ya Kifarsi kwa mtindo wa ghazal.

Qazveh alisisitiza kuwa mashairi yaliyoteuliwa huenda yakatumika baadaye katika matukio mengine ya kitamaduni na kazi za kisanaa.

4315598