Mashindano ya Qur'ani ya Thaqalayn TV yamalizika

IQNA – Toleo la pili la Mashindano ya Kimataifa ya Qur'ani ya "Wa Rattil," yaliyoandaliwa  na Thaqalayn TV, limehitimishwa mwishoni mwa mwezi mtukufu wa Ramadhani, likiwashirikisha washiriki kutoka mataifa mbalimbali wakiwania nafasi za juu. 

Falah Zleif Atiyah (Iraq) alipata nafasi ya kwanza, akifuatiwa na Rahim Sharifi (Iran), Ahmed Razzaq Al-Dalfi (Iraq), Rasoul Bakhshi (Iran), na Yassin Saeed Al-Sayed (Misri), waliopanga nafasi ya pili hadi ya tano, mtawalia. 

Kwa mujibu wa kamati ya maandalizi, zaidi ya washiriki 200 kutoka mataifa ya Asia, Ulaya, Afrika, na Amerika ya Kusini, pamoja na Asia Kusini na Mashariki, walishiriki katika raundi za awali za mashindano. 

Hatua ya kwanza ya mashindano hayo, iliyoanza mwanzoni mwa Ramadhani, iligawanywa katika raundi tatu, kila moja ikidumu kwa siku nane.  

Jumla ya wasomaji 96 walishiriki kwa usiku 24, huku washiriki 24 wakifika fainali. Ili kuhakikisha usawa na kuhamasisha ushiriki mpana, jopo la majaji lilibadilika kwa kila raundi, likijumuisha wataalamu kutoka mataifa mbalimbali. 

Waandaaji walisema kuwa "Wa Rattil" ni mashindano ya kimataifa ya Qur’ani ya kwanza katika ulimwengu ambayo ni mahsusi kwa sanaa ya Tarteel. Tukio hilo, lililokuwa likirushwa moja kwa moja kila usiku wa Ramadhani, lililenga kuonyesha ubora wa usomaji wa Qur'ani na kuhimiza kushiriki katika maandiko matakatifu katika jamii mbalimbali.

3492553