داعش جیسی دہشت گرد تنظیمیں کافروں کی بجائے مسلمانوں کا خون بہا رہی ہیں, صاحبزادہ ابوالخیر محمد زبیر
ایکنا نیوز- شفقنا-ڈاکٹر صاحبزادہ ابوالخیر محمد زبیر نے لداس کلب کی طرف سے منعقدہ افطار پارٹی میں خطاب کرتے ہوئےکہا کہ برما کے مسلمان کسی محمد بن قاسم کو پکار رہے ہیں لیکن اتنی ساری مسلمان ریاستوں میں کوئی بھی محمد بن قاسم نہیں جو انکی مدد کو پہنچے،انہوں نے کہا : قرآن نے مظلوم مسلمانوں کی جس فریاد اور آہ و بکاء کو بیان کیا ہے اس کا پورا نقشہ ہم اپنی آنکھوں سے برما میں دیکھ رہے ہیں لیکن پھر بھی مسلمان حکمراں بے حسی کی تصویر بنے بیٹھے ہیں اور قرآن پر عمل کرتے ہوئے ظالموں سے جہاد کرنے کیلئے تیار نہیں، مسلمانوں کی پستی اور ذلت کا ہی سبب ہے کہ ہم نے جہاد سے منہ موڑ لیا ہے۔
صاحبزادہ ابوالخیر زبیر نے مزید کہا : جہاد جیسے مقدس فریضہ کو بدنام کرنے کیلئے یہود ونصاریٰ نے سازش کی ہیں اور انہوں نے داعش جیسی دھشت گرد تنظیمیں بنالی ہیں جو کافروں سے مقابلہ کرنے کے بجائے خود کش دھماکوں کے ذریعہ اپنے مسلمان بھائی بہنوں اور بے گناہ عورتوں اور بچوں کا خون بہا رہی ہیں یہ جہاد نہیں فساد ہے۔
