پاکستان میں شھدائے غزہ کی یاد میں قرآنی مقابلہ

ایکنا: مقابلہ حفظ و قرائت قرآن کریم شھدائے غزه و لبنان کی یاد میں خانه فرهنگ ایران حیدرآباد اور خانہ فرہنگ پشاور میں منعقد کیا گیا۔

ایکنا: ادارہ ثقافت و تعلقات اسلامی کے مطابق، حالیہ واقعات میں مقبوضہ فلسطین اور لبنان میں ہزاروں خواتین اور بچوں کی شہادت کے پیش نظر، اسلام آباد میں اسلامی جمہوریہ ایران کے ثقافتی مشیر کی تجویز اور مدرسہ قرآنی صراط الہی کی شراکت سے، حیدرآباد سندھ میں ایرانی ثقافتی مرکز میں قرآن کریم کے حفظ و قرأت کے مقابلے کا انعقاد کیا گیا۔

 
اس مقابلے کے ابتدائی مرحلے میں 60 سے زائد قاری اور حافظ قرآن نے شرکت کی، جن میں سے تقریباً نصف شرکاء نے فائنل مرحلے کے لیے کوالیفائی کیا۔ فائنل مرحلہ ایرانی ثقافتی مرکز حیدرآباد میں شرکاء، ان کے سرپرستوں، علماء اور قرآن سے محبت کرنے والے لوگوں کی موجودگی میں منعقد ہوا۔

 
رضا پارسا، ایرانی ثقافتی مرکز حیدرآباد کے ذمہ دار نے فلسطین اور لبنان کے حالیہ واقعات کا ذکر کرتے ہوئے کہا: رہبر معظم انقلاب کے فرمان کے مطابق، ہم سب کی ذمہ داری ہے کہ اپنے فلسطینی اور لبنانی مظلوم بھائیوں کی مدد کریں۔ انہوں نے مزید کہا کہ جب ہم خود براہ راست دشمن کے خلاف میدان میں نہیں جا سکتے، تو ہم اس مقابلے کے ذریعے شہداء کی یاد کو زندہ رکھتے ہیں اور ان کی فتح کے لیے دعا گو ہیں۔ ہمیں امید ہے کہ اسلامی ممالک کے اتحاد سے یہ سرطان زدہ مسئلہ مغربی ایشیا سے ختم ہو جائے گا۔

 
پشاور میں بھی "شہداء قرآنی مقاومت" کی یاد میں منعقدہ مقابلوں میں فاتحین کو اعزازات دیے گئے۔
 
رپورٹ کے مطابق، اسلام آباد میں ایرانی ثقافتی مشیر کے تعاون سے، پشاور میں امام خمینی (رح) ہال میں شہداء قرآنی مقاومت "اسماعیل ہنیہ اور سید حسن نصر اللہ" کے نام سے مقابلے منعقد ہوئے، جس میں 16 سال سے کم اور 16 سال سے زائد عمر کے افراد نے شرکت کی۔ دو ہفتے کے اعلان کے بعد، 85 شرکاء نے اپنی 3 منٹ کی تلاوت جمع کروا کر شرکت کی خواہش ظاہر کی، اور ابتدائی مرحلے میں ان کی تلاوتیں جانچی گئیں جبکہ فائنل مرحلہ براہ راست منعقد ہوا۔

 
ان مقابلوں میں ایران کے قونصل جنرل علی بنفشہ‌خواه اور خیبر پختونخوا کے علماء بھی شریک ہوئے۔ پشاور، کوہاٹ، سوات، ہنگو، پاراچنار اور اورکزئی سمیت مختلف شہروں کے قاریوں نے اس مقابلے میں حصہ لیا۔ علی بنفشہ‌خواه نے مقابلے کے تمام شرکاء کا شکریہ ادا کرتے ہوئے کہا کہ "ایک قاری قرآن کو اس کے معنی کو سمجھ کر پڑھنا چاہیے۔ حضرت رسول اللہ (ص) اس کی بہترین مثال ہیں جنہوں نے قرآن کے خالق کو گہرائی سے پہچانتے ہوئے وحی کے فرشتے کے حکم پر 'اقراء' پڑھا اور اللہ نے اس میں برکت عطا کی۔"
 
تقریب کے اختتام پر، شرکاء کے نمبروں کی گنتی کے بعد پہلی تین پوزیشن حاصل کرنے والوں کو انعامات اور یادگاری ٹرافی دی گئی۔/

4245107