Chuo cha Kiislamu Sarajevo Chaandaa Usiku wa Qur’ani kwa Mwaka Mwingine

IQNA – Chuo cha Masomo ya Kiislamu cha Sarajevo kimeandaa tukio lake la kila mwaka la “Usiku na Qur’ani,” likiwakutanisha wanafunzi na wahifadhi wa Qur’ani kwa jioni ya usomaji, tafakuri na kuthamini Kitabu cha Mwenyezi Mungu.

Kwa mujibu wa Muslims Around the World, “Usiku na Qur’ani” ni utamaduni wa kila mwaka katika chuo hicho, ambapo wanafunzi husoma Qur’ani na kuonesha vipaji vya kisanaa vilivyoandaliwa na wanafunzi wenyewe, kwa lengo la kuimarisha mshikamano wa kiroho na kielimu ndani ya taasisi.

Ahmad Odibašić, mwakilishi wa Jumuiya ya Wanafunzi wa Chuo cha Masomo ya Kiislamu, alisema kuwa mkusanyiko huo unaakisi kujitolea kwa vijana wanaojituma katika huduma ya imani. “Mpango huu ni matokeo ya juhudi za wanafunzi wachanga wanaotumia miaka yao bora kwa matendo mema na kumtumikia Mwenyezi Mungu,” alisema.

Aliongeza kuwa tukio hilo pia ni ishara ya shukrani kwa walimu wanaojumuisha maadili ya Qur’ani katika maisha ya kitaaluma. “Ni alama ya shukrani kwa walimu wanaochanganya elimu ya kitaaluma na maadili ya Qur’ani Tukufu,” Odibašić alifafanua.

Mohammad Selimović, mwanafunzi na mhifadhi wa Qur’ani, alisema kuwa chuo hicho kinatoa mazingira yanayowahamasisha wanafunzi kukua kiroho na kiakili. “Matukio kama haya hututia moyo kuimarisha maarifa ya dini na kujenga uhusiano imara wa kijamii miongoni mwa wanafunzi,” alisema.

3495233