Nakala Kubwa Zaidi ya Qurani Duniani Iliyoandikwa Kwa Mkono

IQNA – Mafanikio ya kihistoria katika sanaa ya hati za Kiislamu yamezinduliwa mjini Istanbul: Ni nakala kubwa zaidi ya Qur'ani duniani iliyoandikwa kwa mkono, matokeo ya juhudi za miaka sita bila kukata tamaa.

Aliyekuwa mfua dhahabu kutoka Iraq ametumia miaka sita akiandika kwa mkono nakala hiyo  ya Qur'ani  mjini Istanbul. Msahafu huo una kurasa zenye urefu wa mita 4 na upana wa mita 1.5.

Ali Zaman, mzaliwa wa 1971 katika mji wa Sulaymaniyah, Iraq, alianza kupenda kaligrafia ya Kiislamu akiwa bado mdogo.

Baada ya kuacha kazi ya ufua dhahabu mwaka 2013, alijitolea kikamilifu kwa sanaa ya uandishi huo.

Mwaka 2017, Zaman alihamia na familia yake katika wilaya ya Fatih, Istanbul, ili kuendeleza kazi yake.

Msahafu huo mkubwa, uliomchukua miaka sita kuukamilisha, umeandikwa kwa mkono kikamilifu kwa kutumia kalamu za mianzi kwa mwandiko wa thuluth, aina kongwe ya hati za Kiarabu katika kaligrafia ya Kiislamu.

Kila ukurasa, unapofunguliwa, unaenea hadi mita 3. Zaman aliepuka kutumia vifaa vya kisasa, akichonga kila herufi kwa umakini wa hali ya juu.

Akiwa peke yake ndani ya chumba kidogo katika eneo la msikiti wa Mihrimah Sultan mjini Istanbul, alifanya kazi kila siku, akisita tu kwa ajili ya chakula na ibada.

Mradi huu umefadhiliwa binafsi bila mfadhili wa nje. Zaman aliendelea hata alipokumbana na changamoto kubwa za kiafya ambazo zililazimu kusitisha kazi kwa muda mwaka 2023.

Amewahi kushinda tuzo nyingi za kimataifa, ikiwemo nafasi ya kwanza katika mwandiko wa thuluth na naskh nchini Syria, Malaysia, Iraq na Uturuki.

Ana ijaza (idhini ya kitaaluma) kutoka kwa mabingwa wa kaligrafia, na mwaka 2017 alipata tuzo ya “Distinction” katika Mashindano ya Kimataifa ya Hilye-i Serif nchini Uturuki, tuzo ambayo alitunukiwa na Rais wa Uturuki, Recep Tayyip Erdogan.

Akizungumza na shirika la habari la Anadolu, Zaman alisema: “Ni furaha kutengeneza kitu ambacho watu wachache wanaweza kukifanya au hata kukijaribu. Kila herufi ina roho na juhudi iliyoingia kwenye kazi hii.”

Mwanawe, Rekar Zaman, alisema familia ilihamia Uturuki kwa kuwa nchi hiyo inathamini sana kaligrafia na sanaa za Kiislamu kuliko Iraq.

Amesema kupata vifaa muhimu wakati wa janga la COVID-19 ilikuwa changamoto kubwa, lakini familia haikukata tamaa.

Msahafu huo umevunja rekodi ya msahafu mkubwa uliokuwepo awali, uliokuwa na vipimo vya mita 2.28 kwa 1.55.

Familia inapanga kuuhifadhi msahafu huo kwa uangalifu, na inatarajia utabaki nchini Uturuki kama ishara ya utamaduni wake wa kihistoria wa uandishi wa kaligrafia.

3495192