Mwanazuoni: Siku ya Kiyama Itakuwa Maonyesho ya Majuto ya Watu Waliohadaiwa
Ayatullah Rahim Tawakol alitoa kauli hiyo katika kikao cha maadili, akielezea kuhusu Siku ya Hukumu au Siku ya Kiyama kwa mujibu wa mtazamo wa Qur’ani Tukufu.
Alisema kuwa moja ya majina ya Siku ya Kiyama ni Yawm At-Taghābun, yaani Siku ya Hasara, Kunyang’anywa, na Kudanganyika. Neno Taghābun linatokana na “Ghubn”, likimaanisha siku ambayo mtu anatambua kuwa amepata hasara kubwa.
“Mara nyingine mtu hununua bidhaa kwa bei ya juu dukani, kisha baadaye hutambua kuwa bei haikuwa halali na amepata hasara. Katika dunia, anaweza kurudisha bidhaa hiyo na kufuta makubaliano,” alifafanua.
Akaongeza: “Tumeumbwa ili tutende matendo na tufikie daraja kupitia baraka za matendo hayo. Tukiondoka duniani, tutaona kuwa kulikuwa na fursa nyingi tulizozipoteza, na lau tungekuwa waangalifu, tungeweza kufikia matokeo makubwa.”
Aliendelea kusema kuwa maeneo ya Peponi na Motoni yameumbwa kwa namna ambayo mtu aliye katika moja anaweza kuona la pili. “Tulipozaliwa, Mwenyezi Mungu alitenga mahali Peponi na Motoni kwa kila mmoja. Ikiwa mtu ni wa matendo mema na imani sahihi, basi mahali pake ni Peponi. Kinyume chake, ni Motoni.”
Ayatullah Tawakol aliongeza kuwa mtu aliyeingia Motoni ataonyeshwa mahali alilopaswa kuwa Peponi, na mandhari hiyo itamletea majuto makubwa. Vilevile, watu wa Peponi wataonyeshwa mahali walipostahili kuwa Motoni lau wangepotoka, na watafurahi mno kwa kuepuka adhabu hiyo.
Alinukuu Aya ya 14 ya Surah Al-Hadid: "(Walioko nje ya Peponi) wataita, ‘Je, hatukuwa pamoja nanyi?’ (Walioko ndani) watajibu, ‘Naam, mlikuwa nasi lakini mliishi maisha ya ukafiri na unafiki, mkatamani kifo kwa (Muhammad), mkapata shaka juu ya ujumbe wake, na matamanio yenu yakawadanganya mpaka amri ya Mwenyezi Mungu ikatimia. Shetani akawadanganya kuhusu rehema ya Mwenyezi Mungu.’”
Mwanafunzi huyo wa dini alieleza kuwa walizama katika dunia ya batili na matamanio, wakajawa na kiburi, na kiburi hicho cha uongo kikawasababisha kuzama katika tope la dhambi na hatimaye wakaishia Motoni.
Alihitimisha kwa kusema kuwa watu wengi huzungumzia uchamungu, lakini hushindwa wanapohitajika kuonyesha matendo ya kweli.
“Miongoni mwa mambo tunayopaswa kufahamu ni kuwa haijalishi tunafanya nini, tutafufuliwa siku moja, na kila kilichomo ndani yetu kitawekwa wazi. Tutafahamishwa kila tulichotenda. Mwenyezi Mungu ni Shahidi na Mwangalizi wa matendo yetu yote. Sasa, tukipelekwa Akhera na matendo haya, je, vichwa vyetu vitainuliwa kwa heshima mbele ya Mwenyezi Mungu, au tutahisi aibu? Lazima tujiandae kwa Siku ya Kiyama.”
3495222
