Ushirikiano katika Uislamu na Kujenga Jamii

IQNA – Msingi wa jamii ni ushirikiano, kushirikiana, na kubadilishana manufaa. Kwa hivyo, mtazamo wa kielimu wa Kiislamu umechukulia ushirikiano kuwa miongoni mwa mahitaji ya fikra za kimaadili.

Udugu wa Kiislamu ni msingi mwingine wa mshikamano wa kijamii na kusaidia wahitaji na waliodhulumiwa katika Uislamu, jambo ambalo pia limetajwa katika Qur’ani na Hadithi. Qur’ani Tukufu inasema: "Hakika Waumini ni ndugu." (Surah Al-Hujurat, Aya ya 10)

Uislamu umefanya Waislamu kuwa ndugu ili kubadilisha maslahi yanayopingana kuwa maslahi ya pamoja na huruma. Kwa hivyo, kwa kuwa wao ni ndugu, ni lazima wasaidiane.

Hivyo basi, ikiwa kuna mtu masikini katika jamii, Muislamu hapaswi kumwacha akiwa na njaa au bila makazi ilhali ana uwezo wa kumsaidia yeye na wengine.

Mtume Mtukufu Muhammad (SAW) amesema katika Hadithi: "Mfano wa Waumini katika mapenzi yao, urafiki wao, huruma yao na kujali hali ya wenzao ni kama mwili mmoja; sehemu moja ikiumia, sehemu nyingine pia huumia."

Kimsingi, ili kufanikisha furaha ya maisha na kufikia ukamilifu, binadamu wana mahitaji ambayo hawawezi kuyatimiza peke yao. Hivyo, ni lazima waunde jamii na kusaidiana. Kwa msingi huo, jamii hujengwa juu ya ushirikiano, kushirikiana, na kubadilishana manufaa.

Imesemwa pia kuwa kuunda jamii na kushirikiana ni tabia ya asili ya binadamu. Tofauti zilizopo miongoni mwa watu katika jamii, katika uwezo wa kimwili, kiuchumi, kijamii, kitamaduni na vinginevyo, zinahitaji watu kusaidiane katika nyanja mbalimbali za maisha.

Kwa hivyo, mtazamo wa Kiislamu umechukulia ushirikiano kuwa miongoni mwa mahitaji ya fikra za kimaadili, na kwa kusisitiza wema na haraka katika kusaidiana miongoni mwa Waumini, umeonya dhidi ya ushirikiano katika maovu yanayochochea dhulma na ukosefu wa usawa katika jamii.

Kwa mujibu wa mapokeo ya Kiislamu, Waislamu wana haki na wajibu kwa wenzao, mojawapo ikiwa ni Muwasat, yaani huruma, kusaidia, na kushirikiana katika mali. Mfano wa Muwasat ni pale ambapo kuna uhaba wa bidhaa sokoni, na mtu hushiriki na wengine bidhaa alizonazo zaidi ya mahitaji yake.

Mtumishi wa Imam Sadiq (AS) anasimulia: "Imamu (AS) aliniambia: Bei za vyakula zimepanda huko Madina. Tuna chakula kiasi gani? Nikasema: Kinatosha kwa miezi kadhaa. Akasema: Toa ukauze. Nilipouza, akasema: ‘Nunua chakula kwa ajili yetu kila siku kama watu wengine... na uandae chakula cha familia yangu kwa nusu shayiri na nusu ngano. Hakika Mwenyezi Mungu anajua kuwa nina uwezo wa kuwapatia ngano, lakini napenda Mwenyezi Mungu anione nikipima maisha kwa usawa.’”

3495083