Mwanachuoni wa Qur’ani Sheikh Ahmed Mansour miongoni mwa majaji wa Mashindano ya Kimataifa ya Qur’ani nchini Misri
Sheikh Ahmed Muhammad Al-Sayed Salem Mansour ni nguzo muhimu katika taasisi za kidini za Misri. Alizaliwa mwaka 1984, na ameibuka kuwa mtaalamu hodari wa qira’a za Qur’ani na uamuzi wa mashindano.
Anashikilia nyadhifa kadhaa za heshima ndani ya taasisi za kidini za Misri. Mansour ni mjumbe wa Kamati ya Marejeo ya Qur’ani (uchapishaji) katika Baraza la Utafiti wa Kiislamu la Al-Azhar, chombo kinachopitia nakala za Qur’ani kabla ya kuchapishwa.
Aidha, yeye ndiye msimamizi wa vituo vya qira’a ya Qur’ani katika Msikiti Mkuu wa Al-Azhar na Msikiti wa Sayyidah Zaynab (SA). Pia anaongoza Kituo cha Al-Maher cha qira’a na hifdhi ya Qur’ani.
Safari yake, asema Mansour, ilianza kwa mapenzi makubwa ya elimu za Qur’ani: “Kupiga hatua katika qira’a imekuwa juhudi ya maisha yangu yote.”
Mbali na kazi ya uamuzi, Mansour ni mhadhiri katika Chuo cha Mafunzo ya Maimamu na Wanazuoni wa Al-Azhar. Pia ni mwalimu wa qira’a kumi (Qara’at) za Qur’ani Tukufu.
Ameshiriki kama jaji katika mashindano mengi, ndani na nje ya Misri, yakiwemo Mashindano ya Al-Azhar na mashindano ya Atr Al-Kalam nchini Saudia.
Tangu mwaka 2018, jukumu lake katika kamati ya marejeo ya Al-Azhar limehusisha kupitia mamia ya nakala za Qur’ani, kuhakikisha usahihi wa maandiko kabla ya kusambazwa kwa matumizi ya kidini.
Sheikh Mansour ametambulishwa na Wizara ya Awqaf ya Misri kama mjumbe wa kamati ya majaji wa Mashindano ya 32 ya Kimataifa ya Qur’ani.
Mashindano hayo yalianza Jumamosi katika Mji Mkuu wa Utawala wa nchi hiyo, yakihusisha washiriki – makari na mahafidh wa Qur’ani – kutoka zaidi ya nchi 70.
