Lebanon Kuandaa Mashindano ya Kimataifa ya Qur’ani ‘Al‑Sadiq Al‑Amin’

IQNA-Lebanon inajiandaa kuwa mwenyeji wa Mashindano ya Kimataifa ya Qur’ani yanayojulikana kama “Al‑Sadiq Al‑Amin,” yatakayofanyika Beirut katika siku za kuelekea mwezi mtukufu wa Ramadhani.

Mashindano haya yanaandaliwa na Kituo cha Utamaduni cha Jamhuri ya Kiislamu ya Iran nchini Lebanon kwa ushirikiano na Jumuiya ya Qur’ani Tukufu ya Lebanon. Washiriki, ambao ni wanaume wenye umri wa miaka 18 hadi 40, watashindana katika nyanja mbili kuu: kuhifadhi Qur’ani nzima na usomaji kwa mahadhi.

Mchujo wa awali utafanyika kwa njia ya mtandaoni, ukifuatiwa na hatua za nusu fainali na fainali zitakazofanyika ana kwa ana. Usajili ulianza Januari 23 na utaendelea hadi Februari 2, na wale watakaopata alama za juu katika awamu ya mtandaoni ndio watakaoruhusiwa kuendelea katika hatua inayofuata.

Masharti ya ushiriki yanamtaka mshiriki awe na umahiri wa kusoma Qur’ani kwa kufuata kanuni sahihi za tajwidi na lahja. Katika kipengele cha usomaji, majaji watapima tajwidi (pointi 40), sauti (15), waqf na ibtidā (20), pamoja na lahja au nagham (25).

Habari inayohusiana:

• Awamu ya Mwisho ya Mashindano ya 25 ya Kitaifa ya Qur'ani ya Lebanon yakamilika

Kwa upande wa hifdhi, ubora wa kuhifadhi utapewa pointi 70 na ubora wa usomaji pointi 30. Mashindano haya yanaendeleza utamaduni mpana wa Kiislamu unaojikita katika usomaji wa Qur’ani, urithi ambao kwa karne nyingi umeunganisha jamii za Kiislamu kutoka Beirut hadi mwambao wa Afrika Mashariki.

4330497