عراق میں طلباء کے لیے گرمیوں میں خصوصی قرآنی کورسز

ایکنا: عراق میں شیعہ اوقاف کے زیرانتظام مرکز ملی علوم قرآن کی جانب سے اسکول طلبہ کے لیے قرآنی تعلیم کی خصوصی گرمیوں کی کلاسوں کا اعلان کیا گیا ہے۔

ایکنا عراق کی رپورٹ کے مطابق، قومی مرکز علوم قرآن، جو شیعہ اوقاف عراق سے وابستہ ہے، نے ملک بھر کے اسکول طلبہ کے لیے گرمیوں کے دوران قرآن کریم کی خصوصی تربیتی کلاسوں کے انعقاد کا اعلان کیا ہے۔

یہ تعلیمی کورس فقہی، عقیدتی اور اخلاقی مضامین پر مشتمل ہوگا اور اس میں 6 سے 15 سال کی عمر کے پرائمری اور مڈل اسکول کے طلبہ و طالبات شرکت کر سکیں گے۔

یہ کلاسیں مرکز علوم قرآن عراق کے "ثقلین ہال" میں منعقد کی جائیں گی اور ان کا آغاز 25 مئی 2025 (مطابق 4 خرداد 1404 ہجری شمسی) سے ہوگا، جبکہ یہ سلسلہ تین ماہ تک جاری رہے گا۔

یہ تعلیمی سرگرمیاں روزانہ صبح 10 بجے سے دوپہر 12 بجے تک جاری رہیں گی۔ اتوار، منگل اور جمعرات کو کلاسیں لڑکیوں کے لیے مخصوص ہوں گی، جبکہ پیر اور بدھ کو یہ کلاسیں لڑکوں کے لیے منعقد کی جائیں گی۔

ان کلاسوں کی نگرانی مرکز علوم قرآن عراق کے مختلف شعبہ جات، جیسے شعبہ قرآنی سرگرمیاں، مرکز حفظ قرآن اور خواتین قاریات و حافظات کے شعبے کے اساتذہ کریں گے۔ اس دوران قرآن مجید کے اجزاء و سورتوں کا حفظ، تجوید و تلاوت کے احکام بھی سکھائے جائیں گے۔

مرکز نے عراق کے تمام دلچسپی رکھنے والے والدین سے اپیل کی ہے کہ وہ اپنے بچوں کی رجسٹریشن کے لیے فلسطین اسٹریٹ پر واقع مرکز کے دفتر، جو ترکمانی کلب "الاخاء" کے قریب ہے، میں رجوع کریں یا کام کے دنوں میں درج ذیل نمبروں پر رابطہ کریں: 07709221913 اور 07710141012۔

4281418