نایجریا میں بریل قرآن تقسیم
ایکنا نیوز- الرایہ نیوز کی رپورٹ کے مطابق یہ قرآنِ کریم کے نسخے قطر چیریٹی کی جانب سے قطری مخیر حضرات کے تعاون سے نائجیریا کی 11 ریاستوں میں نابینا افراد تک کلامِ الٰہی پہنچانے کے مقصد سے تقسیم کیے گئے۔
یہ اقدام ایسے وقت میں کیا گیا ہے جب نائجیریا میں معذور افراد کی تعداد میں نمایاں اضافہ دیکھنے میں آ رہا ہے۔ قومی ادارۂ شماریات کے اعداد و شمار کے مطابق ملک کی تقریباً 6 فیصد آبادی مختلف اقسام کی معذوری کا شکار ہے، جن میں بینائی کی کمزوری اور نابینائی سب سے نمایاں مسائل میں شمار ہوتی ہیں۔
قومی سرویز کے مطابق لاکھوں نائجیریائی شہری بصارت سے متعلق مشکلات کا سامنا کر رہے ہیں۔ دینی وسائل کی محدود دستیابی اور ان کی زیادہ لاگت کے باعث ان افراد کو قابلِ رسائی تعلیمی اور مذہبی مواد کی شدید ضرورت ہے۔
اسی تناظر میں قطر چیریٹی نے اپنے مرکزی دفتر، دوحہ سے بریل رسم الخط میں شائع شدہ 994 نسخے "مصحفِ بصیرت" نائجیریا روانہ کیے، تاکہ انہیں مختلف ریاستوں میں ضرورت مند افراد، خصوصاً نابینا اور کم بینا مسلمانوں میں تقسیم کیا جا سکے جو اس طریقے سے قرآنِ کریم کی تلاوت کر سکتے ہیں۔
تقسیمِ قرآن کی تقریب سوکوتو میں منعقد ہوئی، جس میں احمد علیو نے شرکت کی۔ ان کی موجودگی اس انسانی اور دینی منصوبے کے لیے حکومتی حمایت اور قطر چیریٹی و سرکاری اداروں کے درمیان تعاون کی عکاسی کرتی ہے۔
تقریب کے شرکاء نے اس اقدام پر بے حد خوشی اور مسرت کا اظہار کرتے ہوئے کہا کہ بریل رسم الخط میں قرآنِ کریم کی فراہمی انہیں اس مقدس کتاب کو خود پڑھنے، حفظ کرنے اور اس کے مفاہیم میں غور و فکر کرنے کے قابل بنائے گی، جس سے ان کا تعلقِ قرآن اور روحانی وابستگی مزید مضبوط ہوگی۔
اس موقع پر قطر چیریٹی نے ایک بار پھر نائجیریا کے کمزور اور محروم طبقات کی مدد کے عزم کا اعادہ کیا۔ ادارے نے اس بات پر زور دیا کہ وہ جامع فلاحی پروگراموں کے ذریعے ایسی مؤثر اور پائیدار سرگرمیاں جاری رکھے گا جو تعلیم کے فروغ، سہولیات تک رسائی میں اضافے اور نائجیریا کے سماجی و انسانی ترقیاتی عمل میں معاون ثابت ہوں۔/
4357850
