قطر میں قرآنی تعلیمی اسکیم کا آغاز؛ سینکڑوں طلبہ شریک
ایکنا نیوز- الرایہ نیوز کے حوالے سے خبر دی ہے، قطر میں 2026 کے موسمِ گرما کے قرآنی مراکز کے پروگرام میں 1,300 سے زائد طلبہ شرکت کر رہے ہیں۔ یہ پروگرام وزارتِ اوقاف و امورِ اسلامی قطر کے شعبۂ دعوت و ارشاد کی نگرانی میں ملک بھر کی 12 مساجد میں منعقد کیا جا رہا ہے۔
یہ پروگرام ایک جامع تعلیمی و تربیتی نظام پر مبنی ہے، جس میں قرآنِ کریم کی تعلیم کو ثقافتی، تعلیمی اور بامقصد تفریحی سرگرمیوں کے ساتھ یکجا کیا گیا ہے، تاکہ موسمِ گرما کی تعطیلات سے بھرپور فائدہ اٹھاتے ہوئے طلبہ کا تعلق قرآنِ مجید سے مزید مضبوط کیا جا سکے۔
قطر کی مساجد میں جاری یہ قرآنی پروگرام مختلف مراحل پر مشتمل ہے، جو شرکاء کی عمر، علمی استعداد اور قرآنی مہارت کے مطابق ترتیب دیا گیا ہے۔ اس کا مقصد طلبہ کی شخصیت کی متوازن نشوونما اور ان میں اسلامی اقدار کو مضبوط بنیادوں پر استوار کرنا ہے۔
قطر کے گرمیوں کے قرآنی مراکز اپنے تعلیمی پروگرام کو دو بنیادی حصوں میں تقسیم کرتے ہیں، جنہیں مختلف عمر کے گروہوں اور مہارت کی سطحوں کے مطابق خاص طور پر تیار کیا گیا ہے، تاکہ ہر طالب علم اپنی صلاحیت اور تعلیمی ضرورت کے مطابق مناسب رہنمائی حاصل کر سکے۔
پہلا حصہ "ابجد" کے نام سے پانچ سے نو سال کی عمر کے بچوں کے لیے مخصوص ہے۔ اس میں عربی حروفِ تہجی کی تعلیم، قرآنِ کریم کی درست قراءت کی مہارت، نیز مختصر سورتوں کی حفظ و تلاوت پر خصوصی توجہ دی جاتی ہے۔
دوسرا حصہ "ماہر فی القرآن" کے عنوان سے ان افراد کے لیے ہے جنہوں نے قرآنِ کریم حفظ کر لیا ہے اور اپنی قرآنی مہارت میں مزید اضافہ کرنا چاہتے ہیں۔
"ماہر فی القرآن" پروگرام بھی دو مراحل پر مشتمل ہے۔ پہلے مرحلے میں ان شرکاء کے لیے قرآنِ کریم کا دور اور اعادہ کرایا جاتا ہے جنہوں نے کم از کم تین یا اس سے زیادہ پارے حفظ کیے ہوئے ہیں۔ اس کا مقصد حفظ کو مضبوط بنانا، قراءت میں مہارت پیدا کرنا اور درستگی میں اضافہ کرنا ہے۔
دوسرا مرحلہ ان افراد کے لیے ترتیب دیا گیا ہے جو قرآنِ کریم کے مزید حصے حفظ کرنا چاہتے ہیں۔ اس میں شرکاء کو ان کی صلاحیت اور استعداد کے مطابق مرحلہ وار دو، تین، چار یا پانچ پارے حفظ کرائے جاتے ہیں، تاکہ ہر طالب علم اپنی رفتار اور قابلیت کے مطابق مؤثر انداز میں حفظِ قرآن مکمل کر سکے۔
4366710
