مصری قرآنی مقابلوں کے زبانی ٹیسٹ کا آغاز
ایکنا نیوز نے صدی البلد کے حوالے سے رپورٹ کیا ہے کہ مصر کی وزارتِ اوقاف نے 33ویں بین الاقوامی مقابلۂ قرآن کریم میں شرکت کے لیے اہل امیدواروں کے حتمی مرکزی زبانی امتحانات کی تاریخ کا اعلان کر دیا ہے۔
وزارت نے اپنے بیان میں کہا ہے کہ یہ امتحانات بدھ، 29 جولائی 2026ء کو باب اللوق کے علاقے میں واقع مسجد الرحمہ (وزارتِ اوقاف کی پرانی عمارت کے قریب) میں منعقد ہوں گے، جبکہ امیدواروں کی آمد کا وقت صبح 10 بجے مقرر کیا گیا ہے۔
امتحانات میں حفظِ قرآن، تجوید (تلاوت)، قرآنی مفاہیم کا فہم اور آیات کے اسبابِ نزول سے متعلق سوالات شامل ہوں گے۔ ان میں نمایاں کامیابی حاصل کرنے والے امیدوار مصر کی نمائندگی کرتے ہوئے 33ویں بین الاقوامی مقابلۂ قرآن کریم میں شرکت کریں گے۔
مصر کے 33ویں بین الاقوامی مقابلۂ قرآن کریم کا انعقاد 2026ء میں ممتاز مرحوم مصری قاری شیخ عبد الفتاح شعشاعی کی یاد میں کیا جائے گا۔
وزارتِ اوقاف نے اپنے بیان میں اس بات پر زور دیا کہ ان مقابلوں کا مقصد حفاظِ قرآن کی حوصلہ افزائی، قرآنی ثقافت کا فروغ، اور قرآنی صلاحیتوں کے حامل افراد کو حفظ، تدبر اور قرآنِ کریم کے معانی کو سمجھنے کی ترغیب دینا ہے۔
واضح رہے کہ مصر کے بین الاقوامی حفظ و قراءتِ قرآن مقابلوں کے مختلف ادوار ہمیشہ نامور مصری قراء کی یاد میں منعقد کیے جاتے رہے ہیں۔ 26واں مقابلہ شیخ محمود خلیل الحصری کے نام سے، 27واں مقابلہ استاد عبدالباسط عبدالصمد کے نام سے، جبکہ 32واں بین الاقوامی مقابلۂ قرآن کریم استاد شحات محمد انور، جو مصر اور عالمِ اسلام کے ممتاز مرحوم قاری تھے، کی یاد میں منعقد کیا گیا تھا۔/
4366690
