Tamasha la Kwanza la Qur’ani Tukufu lafanyika Al Hoceima, Morocco

IQNA-Mji wa Al Hoceima, ulioko kaskazini mwa Morocco, umeandaa tamasha lake la kwanza la Qur’ani Tukufu, likiwatambua washiriki mashuhuri wa mashindano ya kitaifa ya kuhifadhi na kusoma Qur’ani. Tukio hilo lilianza Ijumaa, Julai 25, na liliambatana na maadhimisho ya miaka 26 tangu Mfalme Mohammed VI achukue madaraka ya kifalme.

Tamasha hili lilijumuisha shughuli mbalimbali za kidini na kiutamaduni, ikiwemo msafara wa mitaani wenye mandhari ya Qur’ani, maonesho ya machapisho ya kidini, warsha za kaligrafia kwa watoto, na makongamano ya kielimu kuhusu Uislamu. Washiriki walitoka katika kada tofauti za jamii, wakiwemo viongozi wa mtaa, maafisa wa mahakama na jeshi, pamoja na wawakilishi wa jamii ya kiraia.

Waandaaji walieleza tamasha hilo kuwa fursa muhimu ya kuwaheshimu mahafidh wa Qur’ani na wale wanaochangia katika harakati za kidini na kiutamaduni katika eneo hilo. Katika juhudi za kuimarisha mafundisho ya Kiislamu miongoni mwa diaspora ya Morocco, nakala za Qur’ani zilizotafsiriwa zilisambazwa kwa Wamorocco walioko katika mataifa ya ng’ambo.

Moja ya vipengele vilivyogusa hisia za hadhira ilikuwa ni heshima maalumu kwa mwanamke mzee aliyeshiriki katika programu za kujifunza kusoma Qur’ani na kampeni dhidi ya ujinga. Hatua hii ilielezwa na waandaaji kuwa ni ishara ya kuthamini elimu na kushikamana na misingi ya dini kwa watu wa rika zote.

Akizungumza kuhusu tamasha hilo, Mohamed Ouriyaghel, kiongozi wa Baraza la Wataalamu wa Kiislamu wa Al Hoceima, alisema kuwa tamasha hilo si sherehe ya kupita tu, bali ni ishara ya ahadi ya kudumu ya Morocco kuunga mkono wahadhiri wa Qur’ani. Naye Mohamed Fahim, mwakilishi wa masuala ya Kiislamu wa kanda hiyo, alisisitiza umuhimu wa kuimarisha uhusiano wa watoto na Qur’ani na kuhimiza familia kuwapeleka watoto wao kwenye shule za Qur’ani za jadi.

3494027