Marufuku ya Hijabu kwa wasichana wadogo Austria yazua lawama za chuki dhidi ya Uislamu
Serikali imeelezea sheria hiyo kama “msimamo thabiti wa usawa wa kijinsia,” licha ya sheria ya awali kufutwa na Mahakama ya Katiba mwaka 2020 kwa ubaguzi dhidi ya Waislamu.
Sheria hiyo mpya, itakayotekelezwa katika shule za umma na binafsi, inapiga marufuku kile kinachoitwa “mitandio ya kitamaduni ya Kiislamu.” Ukiukaji unaweza kuhusisha mamlaka za shule na hatimaye faini inayoweza kufikia euro 800 (takriban dola 940).
Kiongozi wa wabunge wa chama cha kiliberali cha Neos, Yannick Shetty, ambacho ni sehemu ya serikali ya mseto, alisema kuwa sheria hiyo “si hatua dhidi ya dini yoyote,” bali ni “hatua ya kulinda uhuru wa wasichana nchini.” Alidai kuwa marufuku hiyo itawaathiri takriban watoto 12,000, akisisitiza kuwa hijabu “inawafanya wasichana waonekane kwa mtazamo wa kijinsia.”
Mwaka 2018, serikali ya Austria ilipitisha marufuku ya hijabu kwa wasichana wa miaka 6 hadi 10 katika shule za umma, lakini ilifutwa na mahakama mwaka 2020.
Shirika la Amnesty International limeikosoa vikali sheria mpya, na kuitaja kuwa ya kibaguzi na “dhihirisho la ubaguzi dhidi ya Waislamu.” Shirika hilo limesema sheria hiyo “inawabagua waziwazi wasichana Waislamu” na inaweza “kuchochea chuki na dhana potofu zilizopo dhidi ya Waislamu.”
Jumuiya ya Kidini ya Kiislamu Austria (IGGOe), chombo rasmi kinachowakilisha Waislamu nchini humo, pia imelaani sheria hiyo.
Rais wa IGGOe, Umit Vural, alisema:
“Kama jumuiya ya kidini inayotambuliwa na serikali, tunawajibika kwa wanachama wetu. Kwa hiyo tunalazimika kuhakikisha kila sheria inayokiuka uhuru wa dini inachunguzwa kikatiba.”
Akaongeza:
“Watoto wanahitaji ulinzi, elimu na mwanga wa maarifa. Tunakataa kulazimishwa. Tunatetea uhuru, kwa kila mtoto, kwa wakati mmoja.”
3495709
