سانحہ پشاور سے ہمارے دل خون کے آنسو رو رہے ہیں، علامہ ناصر عباس جعفری
ایکنانیوز- ابنا کی رپورٹ کے مطابق مجلس وحدت مسلمین پاکستان کے سربراہ علامہ ناصر عباس جعفری نے پشاور سانحہ پر تین روزہ سوگ کا اعلان کرتے ہوئے اسے قومی سانحہ قرار دیا ہے۔ اپنے مذمتی بیان میں علامہ ناصر عباس جعفری نے کہا ہے کہ پشاور واقعہ نے پوری قوم کو سوگ میں مبتلا کر دیا ہے۔ واقعہ سے ہمارے دل خون کے آنسو رو رہے ہیں۔
علامہ ناصر عباس جعفری کا کہنا تھا کہ جب تک شہروں میں موجود دہشتگردوں کے سلیپر سلز ختم نہیں کیے جاتے اس وقت تک دہشتگردوں سے چھٹکارا ممکن نہیں، لٰہذا آپریشن ضرب عضب کا دائرہ پورے ملک تک بڑھایا جائے اور دہشتگردی کا خاتمہ کیا جائے۔
سربراہ وحدت مسلمین نے ملک بھر میں دہشتگردوں کیخلاف آپریشن کلین اپ کا مطالبہ کیا ہے اور کہا ہے کہ پاکستان بھر میں موجود دہشتگردوں کی محفوظ پناہگاہوں کو ہمیشہ ہمیشہ کیلئے ختم کیا جائے۔ ان کا کہنا تھا کہ قوم دہشتگردوں سے نجات چاہتی ہے، ایسے مدارس جو دہشتگردوں کو پناہ دیتے ہیں، جو انہیں پروان چڑھاتے ہیں اور وہ لوگ جو انہیں لاجسٹک سپورٹ فراہم کرتے ہیں ان کو بھی قانون کی گرفتار میں لایا جائے۔
پشاور میں ہونے والے اس انسانیت سوز مظالم کے خلاف کل کراچی میں ملت جعفریہ کی جانب سے بھرپور احتجاج کیا جائے گا، ان احتجاج اور مظاہرے مجلس وحدت المسلمین اور امامیہ اسٹوڈنٹس آرگنائزیشن پاکستان کی جانب سے اعلان شدہ پروگرام کے تحت کیے جائیں گے۔
اطلاعات کے مطابق کل دوپہر 2 بچے آئی ایس او کی جانب سے پریس کلب پر مظاہرے کا اعلان کیا گیا ہے،جبکہ مجلس وحدت المسلمین کی جانب سے بعد از مغربین برٹیو روڈ نذد خراسان امامبارگاہ ایک احتجاجی مظاہرہ اور چراغاں کیا جائے گا۔
