مصر میں تقسیم قرآن کے لیے الازهر کی مہم
ایکنا نیوز- صدی البلد کے حوالے سے بتایا گیا ہے کہ یہ مہم شیخ الازہر، احمد الطیب کی ہدایات پر عمل درآمد کے تحت شروع کی گئی ہے۔ اس کا مقصد حفظِ قرآن کے مراکز کی سرپرستی، ان کے کردار کو مضبوط بنانا اور موسمِ گرما کی قرآنی سرگرمیوں کی تیاری کرنا ہے، جنہیں مختلف مصری صوبوں کے قرآنی مکتبوں اور حفظِ قرآن کے حلقوں میں غیر معمولی پذیرائی حاصل ہو رہی ہے۔
یہ پروگرام شعبۂ مؤسساتِ ازہری کے سربراہ احمد الشرقاوی کی قیادت اور جامعہ الازہر کے نائب شیخ ایمن عبدالغنی کی نگرانی میں گزشتہ روز 30 خرداد کو مصر کے صوبہ اقصر سے شروع کیا گیا۔
مہم آج صوبہ قنا میں جاری رہے گی، جبکہ پیر کے روز اسے سوہاج، اسیوط اور منیا تک توسیع دی جائے گی۔ بعد ازاں اسے مصر کے دیگر صوبوں میں بھی نافذ کیا جائے گا۔
یہ منصوبہ الازہر کی نگرانی میں کام کرنے والے تمام حفظِ قرآن مراکز کے لیے مخصوص ہے، جہاں قرآن سیکھنے والوں اور حفظِ قرآن کے حلقوں کو ان کی ضرورت کے مطابق قرآنِ مجید کے نسخے فراہم کیے جائیں گے۔
منصوبے کے انتظامی ذمہ داروں میں شامل ابوالیزید سلامہ نے بتایا کہ قرآنِ کریم کی تقسیم ہر صوبے کی حقیقی ضروریات کا جائزہ لینے کے بعد کی جا رہی ہے تاکہ حفظِ قرآن کے مراکز کی ضروریات مؤثر انداز میں پوری کی جا سکیں۔
نائب الازہر شیخ ایمن عبدالغنی نے کہا کہ یہ منصوبہ قرآنِ کریم اور قرآنی سرگرمیوں سے وابستہ افراد کی سرپرستی کے لیے الازہر کی جامع حکمتِ عملی کا حصہ ہے، جو ایک زیادہ باشعور، متوازن اور مستحکم معاشرے کی تشکیل میں مددگار ثابت ہوگا۔
اس موقع پر احمد الشرقاوی نے زور دیا کہ شعبۂ مؤسساتِ ازہری موسمِ گرما کی قرآنی سرگرمیوں کو خصوصی اہمیت دیتا ہے، کیونکہ یہ نوجوانوں کے اوقاتِ فراغت کو قرآن حفظ کرنے، قرآنی احکام و آداب سیکھنے اور وحیِ الٰہی کی تعلیمات سے ماخوذ اخلاقی اور قومی اقدار کو فروغ دینے کا بہترین موقع فراہم کرتی ہیں۔/
4359562
