Tamasha la Kimataifa la Qur'ani na Hadithi la Al-Mustafa lafanyika kwa mafanikio Tanzania

IQNA – Toleo la 30 la Tamasha la Kimataifa la Qur'ani na Hadithi la Al-Mustafa limehitimishwa nchini Tanzania kwa hafla maalum ya kufunga, ambapo washiriki bora wa tukio hilo walitunukiwa.

Tamasha hili, ambalo ni mojawapo ya matukio muhimu ya kidini na kitamaduni katika eneo la Afrika Mashariki, lilikutanisha mamia ya washiriki na viongozi kutoka maeneo mbalimbali ya kanda hiyo.
Hujjatul Islam Ali Taghavi, Mkurugenzi wa Chuo Kikuu cha Kimataifa cha Al-Mustafa nchini Tanzania, alitoa hotuba wakati wa hafla ya kufunga iliyofanyika Alhamisi, Mei 23. Katika hotuba yake, alisisitiza umuhimu wa tamasha hilo katika kuimarisha uhusiano wa kiroho miongoni mwa Waislamu na kukuza mazungumzo ya kidini.
“Tamasha hili ni mojawapo ya matukio mashuhuri ya kiutamaduni na kidini katika Afrika Mashariki, likiwa na nafasi muhimu katika kuleta umoja wa kiroho na kutoa jukwaa la maingiliano ya kidini,” alisema Hujjatul Islam Taghavi.
Kwa mwaka huu, tamasha hilo lilikuwa na washiriki 650 kutoka miji kumi nchini Tanzania, wakishindana katika kategoria mbalimbali ikiwa ni pamoja na kuhifadhi Qur'ani, kusoma kwa taratibu na tajwidi, Nahj al-Balagha, Hadithi, na Adhana. Washindi wa kila kipengele walizawadiwa.
Tamasha lilifanyika kwa kaulimbiu ya "Qur'ani Inatuunganisha: Ujumbe wa Umoja na Urafiki Miongoni mwa Mataifa," likiwa na lengo la kuendeleza maadili ya Qur'ani na kuimarisha mahusiano ya kidini na kitamaduni kati ya mataifa, pamoja na kuleta mshikamano ndani ya Umma wa Kiislamu.
Tukio hilo lilihudhuriwa na wanazuoni wengi, watu mashuhuri wa utamaduni, na viongozi wa kisiasa, akiwemo Balozi wa Iran na Mwambata wa Utamaduni wa Iran nchini Tanzania, Mufti Mkuu wa Tanzania Sheikh Abubakar bin Zubeir, pamoja na maafisa wa serikali.
Takribani watu 2,000 walihudhuria tamasha hilo, huku matukio makuu yakijumuisha usomaji wa Qur'ani wenye mvuto, mikutano ya kuimarisha uelewa wa Qur'ani, na vikao vya kitaaluma vilivyojikita kwenye elimu za Qur'ani na Hadithi.
Mojawapo ya matukio muhimu katika tamasha hilo lilikuwa uzinduzi wa tafsiri ya Kiswahili ya Tafsir Noor, iliyoandikwa na Hujjatul Islam Mohsen Qara’ati na kutarjumiwa na Sheikh Bakari Matega.

Tamasha hilo pia lilikuwa na wasomaji maarufu wa Qur'ani kutoka Iran, wakiwemo Hamed Shakernejad na Ahmad Abolghasemi.

 

4284107