Maqari Wairani washiriki hafla nyingine ya Qur'ani nchini Tanzania

IQNA – Hafla maalum ya Qur'ani imefanyika jijini Dar es Salaam, Tanzania, ikiweka pamoja Waislamu ambao wamewasikiliza Maqari mashuhuri kutoka Iran waliotambulika kupitia kipindi maarufu cha televisheni cha Mahfel.

Hafla hiyo, iliyoandaliwa katika Msikiti mkuu wa Khoja na Imambargha (ukumbi wa kidini), ilifanyika kwa mwaliko wa Kamati ya Tabligh ya Jumuiya ya Khoja Ithna-Asheri ya Dar es Salaam.

Kwa mujibu wa ofisi ya mwambata utamaduni wa Iran nchini Tanzania, tukio hilo lilihudhuriwa na umati mkubwa wa wanajamii na wanafunzi wa Qur'ani kutoka shule zinazohusiana na jumuiya hiyo.

Kipindi cha Mahfel, kinachorushwa hewani nchini Iran wakati wa mwezi mtukufu wa Ramadhani—kimepata umaarufu mkubwa kwa kuwaleta waqari wa kimataifa, maonyesho ya kuvutia ya Qurani, na kukuza uhusiano wa kiroho kwa watazamaji.

Miongoni mwa washiriki alikuwa Hamed Shakernejad, mwalimu na qari maarufu wa Iran anayejulikana kwa mtindo wake wa kugusa hisia na mchango wake katika matukio ya kimataifa ya Qurani.

Pia walikuwepo wataalamu maarufu wa Qurani kutoka Iran kama Ahmad Abolghasemi, Masoumi, kijana qari Mohammad Hossein Azimi, na msichana kijana anayehifadhi Qur'ani, Mehnaz Qanbari.

Kazim Dala, mkuu wa Kamati ya Tabligh katika Jumuiya ya Khoja Ithna-Asheri, alitoa shukrani zake kwa timu ya Mahfel kwa kukubali mwaliko wao na alisifu ubora wa hafla hiyo.

Mwambata wa Kiutamaduni wa Iran nchini Tanzania, Bw. Maarefi, alieleza kuwa mkusanyiko huo ulikuwa fursa ya kipekee kwa wataalamu na taasisi za kimataifa za Qurani kuungana na jamii ya Kishia ya Khoja.

Mpango huo ulikuwa ni jitihada za pamoja baina ya Taasisi ya Kimataifa ya Qur'ani, timu ya uzalishaji vipindi vya Mahfel, Kituo cha Kimataifa cha Qur'ani na Tabligh cha Shirika la Utamaduni na Mahusiano ya Kiislamu, na tawi la Chuo Kikuu cha Kimataifa cha Al-Mustafa nchini Tanzania.

3493246