Wachezaji wa Iraq Waomba Kuvaa Jezi Nyeusi Katika Mechi Dhidi ya Senegal Usiku wa Kuamkia Ashura

IQNA – Timu ya taifa ya mpira wa miguu ya Iraq inatarajiwa kukutana na Senegal katika mechi ya Kombe la Dunia 2026 usiku wa kuamkia siku ya Ashura baadaye mwezi huu.

Kwa sababu hiyo, Shirikisho la Mpira wa Miguu la Iraq limeomba idhini ya FIFA ili timu ya taifa iweze kuvaa jezi nyeusi katika mechi hiyo.

Ombi hilo limewasilishwa kwa heshima na taadhima kwa Imam Hussein (AS), kwa mujibu wa ripoti ya Al‑Thazad.

Shirikisho la Mpira wa Miguu la Iraq limeanza mashauriano rasmi na FIFA katika hatua yenye ishara na maana kubwa, kwa lengo la kuwasilisha ujumbe wa kitamaduni na wa kidini wa taifa lao kwa ulimwengu pembezoni mwa mashindano ya Kombe la Dunia.

Uamuzi huu wa Wairaqi, uliolenga kuhifadhi na kuheshimu ibada na maombolezo ya mwezi mtukufu wa Muharram pamoja na kutoa heshima kwa siku za huzuni, umeripotiwa kwa upana katika vyombo vya habari vya eneo hilo.

Sasa inabaki kuonekana jinsi FIFA itakavyojibu ombi hili la kitamaduni na kihisia, hasa ikizingatiwa kanuni zake kali kuhusu vifaa na sare za timu, wakati ombi hilo linachukuliwa kuwa ishara ya utambulisho wa kitaifa na wa kidini pamoja na mapenzi ya wananchi wa Iraq kwa maadili yao.

Siku ya Ashura ni siku ya kumi ya mwezi wa Kiislamu wa Muharram, na ni siku ya maombolezo kwa kukumbuka kuuawa shahidi kwa Imam Hussein na wenzake katika Vita vya Karbala mwaka 61 H sawa na 680 BK.

Mwaka huu, siku ya Ashura inaangukia Alhamisi, tarehe 15 Juni.

4356712