Wahalifu wahujumu Msikiti wa Moncton, Kanada kwa maandishi ya Chuki Dhidi ya Uislamu
Ali Ettarnishi, rais wa Chama cha Waislamu wa Moncton, amesema tukio hilo limesikitisha na limeifanya jamii kujihisi kutokuwa salama zaidi. Alibainisha kuwa hii ni mara ya pili mwaka huu tukio la aina hiyo kutokea.
“Nafahamu kwamba jambo hili haliwakilishi jamii pana wala maadili ya mji wa Moncton, lakini wakati huo huo tunataka kulichukulia kwa uzito na lichukuliwe hatua stahiki,” amesema Ettarnishi.
Amesema pia anatumaini kuona doria za polisi zikiongezwa katika siku zijazo ili kuipa jamii utulivu wa nafsi.
“Tunalichukulia jambo hili kwa uzito mkubwa na tunataka usalama uwepo kwa kila mtu,” alisema Ettarnishi. “Moncton ni mji salama, lakini bado mtu hawezi kujua.”
Uharibifu huo katika sehemu ya nje ya Msikiti wa Moncton ulihusisha maandishi yaliyowaambia Waislamu “warudi kwao.” Tukio hilo liligunduliwa na mwanajamii aliyefika alfajiri kwa ajili ya swala, amesema.
“Hatutaki jambo kama hili litokee kwa msikiti mwingine wowote, wala kwa sinagogi au kanisa,” aliongeza.
Koplo Luc Picard wa Kikosi cha Polisi cha RCMP cha Mkoa wa Codiac alithibitisha kupitia barua pepe kuwa polisi wanafanya uchunguzi, lakini alikataa kufanya mahojiano akieleza kuwa uchunguzi bado unaendelea. Alisema graffiti hiyo “inaonekana kuwa na maudhui ya chuki dhidi ya Uislamu.”
“RCMP huchukulia kwa uzito mkubwa taarifa zote za matukio ya chuki au uhalifu unaolenga watu binafsi au jamii,” aliandika Picard. Alitoa wito kwa yeyote mwenye taarifa zinazoweza kusaidia uchunguzi huo kuwasiliana na RCMP.
Ettarnishi amesema msikiti huo umekuwepo katika mji huo kwa takribani miaka 25. Miongoni mwa shughuli zake za kijamii ni kutoa kifungua kinywa kwa watu wasio na makazi na kuandaa siku za “msikiti wazi,” ambapo wananchi wanaweza kutembelea, kuuliza maswali na kujifunza zaidi kuhusu Uislamu.
Alieleza pia kuwa jamii ya waumini katika msikiti huo inajumuisha watu waliokuja Kanada kutoka nchi 14 tofauti.
“Hivyo basi wanaposema turudi nyumbani, tunasema: hapa ndiko nyumbani kwetu,” alisema.
Omer Ugurel, mmoja wa waumini wa msikiti huyo mwenye asili ya Uturuki ambaye ameishi Kanada kwa miaka 26, alisema: “Tumeikubali Kanada kuwa ni nyumbani kwetu,” kwa kuwa wengi wao wameishi hapa kwa muda mrefu.
“Haya ni matendo yasiyokubalika, si kwa Waislamu pekee bali kwa dini zote,” alisema.
Ketan Reval wa Moncton Cares, kundi linalofanya kazi ya kuwakaribisha wahamiaji na wageni wapya, amesema ana wasiwasi kuhusu athari za tukio hilo kwa hisia za usalama miongoni mwa watu.
“Tunaweka juhudi nyingi katika kujenga hisia ya kuwa hapa ni mahali pa mtu kuhusika na kuishi kwa amani, na tunajaribu kuzijumuisha jamii hizi katika maisha ya Moncton,” alisema Reval.
Aliongeza kuwa tukio kama hili linadhoofisha juhudi za kuwaleta watu pamoja.
“Linaongeza msongo zaidi katika maisha yao ambayo tayari yana changamoto, hasa wanapojaribu kujenga maisha mapya katika nchi ambayo ni mpya kabisa kwao.”
/3497731
