Dunia ya leo yahitaji ujumbe wa Rumi zaidi kuliko wakati Wowote

IQNA – Wazungumzaji katika mkutano kuhusu Maulana Jalaluddin Rumi uliofanyika Kuala Lumpur, Malaysia, wameangazia namna dunia ya sasa inavyohitaji mafundisho ya mshairi na sufi huyo mkubwa wa Kiirani.

Mkutano huo uliopewa jina “Maulana: Mwingiliano wa Kitamaduni kati ya Iran na Malaysia” umefanyika katika Chuo Kikuu cha UM, kwa mujibu wa Habib Reza Arzani, mwambata wa utamaduni wa Iran nchini Malaysia.

Katika mahojiano, Arzani alieleza kuhusu upekee wa tukio hilo, kauli za wanafikra wa Kimalaysia, na ujumbe wa kiulimwengu wa Rumi kuhusu mapenzi, huruma na kuunganisha mataifa.

Amesisitiza kuwa mkutano wa kielimu umefanikiwa kwa juhudi za Kituo cha Kitamaduni cha Iran, Chuo Kikuu cha UM na Taasisi ya Masomo ya Kimalay. Tukio hilo limepokelewa vyema na wahadhiri na wanafunzi wa vyuo vikuu vya Malaysia, wasanii, Wairani wanaoishi nchini humo, pamoja na wawakilishi wa balozi za Iran, Iraq na Tajikistan.

Arzani alieleza kuwa kundi la wanazuoni mashuhuri kutoka Malaysia na Iran walijadili mashairi ya Rumi kwa mitazamo ya kiroho na ya kivilivilizishaji. Miongoni mwao walikuwemo Sabzali Musa Khan, Profesa Ahmad Murad Merikan, Mehdi Sultanzadeh na Shafaat Al-Sara Salahuddin. Walibainisha nafasi ya Rumi katika maendeleo ya fikra na utamaduni wa ulimwengu wa Kiislamu.

Profesa Merikan hata alitaja kuwa amempa mwanawe jina Rumi kwa heshima ya mshairi huyo wa Kifarsi, na akaomba kuchapishwa kwa toleo dogo na nafuu la Masnavi kwa lugha ya Kimalay.

Arzani alisema mada ya hotuba yake ilikuwa: “Rumi: Daraja la Milele la Tamaduni, Mapenzi na Huruma kama Lugha ya Kimataifa.”

Alisisitiza: “Katika dunia ya leo, ambapo mipaka ya kisiasa na kiuchumi mara nyingi hufanya mahusiano kati ya mataifa kuwa magumu, ni utamaduni na kiroho vinavyounda madaraja ya watu. Mmoja wa wajenzi wakubwa wa daraja hili la kiroho ni Rumi; mshairi ambaye ujumbe wake wa mapenzi na umoja umepenya katika nyoyo za tamaduni kwa karne nyingi.”

Kwa mujibu wa Rumi, moyo wa mwanadamu unajua lugha moja tu: lugha ya mapenzi. Lugha hii iko juu ya mipaka ya kijiografia na ya kilugha na huleta mataifa karibu zaidi.

Arzani aliorodhesha njia nne muhimu za mshikamano kwa mtazamo wa Rumi: Tafsiri na ubadilishanaji wa kitamaduni, mazungumzo ya tamaduni, staarabu na dini mbalimbali, sanaa na muziki, hususan mashairi na diplomasia ya kitamaduni na kisayansi

Alisema: “Katika dunia iliyojeruhiwa na kutoelewana na mgawanyiko, Rumi anatualika tuone kwa macho ya mioyo yetu na kuzungumza kwa mapenzi. Anatuonya kuwa mara nyingi watu huzungumza kwa mashaka yao, si kwa ukweli.”

Akihitimisha, alirejelea kipengele cha kisanii cha mkutano huo na kusema: “Mkutano huu ulikuwa mwanzo wenye thamani katika njia ya ushirikiano wa kitamaduni kati ya Iran na Malaysia. Insha’Allah, mwingiliano huu utaendelea na kufungua njia ya mahusiano mapana na ya kina zaidi kati ya mataifa haya mawili.”

4317197