Msikiti wa Bucharest: Urithi wa uvumilivu na maisha ya pamoja

IQNA – Msikiti wa Hunkar uliopo Bucharest, mji mkuu wa Romania, unasimama kama alama ya jadi ya nchi hiyo ya Kusini Mashariki mwa Ulaya katika kuenzi uvumilivu wa kidini na maisha ya pamoja kwa amani.

Msikiti huu unaendelea kuwa mahala hai pa ibada, sambamba na kuwa ishara ya kudumu ya urafiki wa kihistoria kati ya Türkiye na Romania.

Ulijengwa mwaka 1906 na Mfalme Carol I, mtawala Mkristo, kwa ajili ya jamii ya Waislamu, jambo linalodhihirisha historia ndefu ya Romania ya kuheshimu dini mbalimbali na kuishi kwa maelewano. Hivi karibuni, msikiti huu uliangaziwa katika sehemu ya mwisho ya makala maalumu ya shirika la Anadolu yenye kichwa “Madaraja ya Urafiki kati ya Türkiye na Romania.”

Imam Mehmet Ertugrul, ambaye amehudumu msikitini hapo kwa takribani miaka minne, alisema kuwa Bucharest ni mazingira salama na jumuishi kwa Waislamu. Alibainisha kuwa chuki dhidi ya Uislamu si jambo lililoenea nchini Romania, na akasisitiza tabia ya heshima na ukarimu inayodhihirika katika maisha ya kila siku.

Imam wa pili, Memis Firaz, Mturuki-Mtatari kutoka Constanța, alisisitiza umuhimu wa kuhifadhi lugha, imani na utambulisho wa kitamaduni kizazi hadi kizazi. Akitoka katika familia yenye vizazi vitatu vya uongozi wa kiimamu, Firaz alieleza nafasi ya mwendelezo wa utamaduni ndani ya jamii ya Kiislamu.

Mfanyabiashara Cesur Durak, mshiriki wa msikiti na mjukuu wa mwanajeshi aliyepata Nishani ya Uhuru ya Uturuki, alisema kuwa kubeba utambulisho wa Kiislamu nchini Romania ni jukumu lenye uzito na heshima. Alisisitiza umuhimu wa kuenzi urithi wa mababu kupitia uwakilishi chanya.

Msikiti huu pia una umuhimu wa kihistoria kutokana na kuhamishwa kwake. Mwaka 1959, ulivunjwa jiwe kwa jiwe kama sehemu ya mradi wa makumbusho katika Carol Park, na mwaka 1960 ukajengwa upya katika eneo lake la sasa kwa kutumia mpango ule ule wa usanifu wa awali.

3495750