Mashindano ya Kimataifa ya Qur'ani yafunguliwa Baghdad

IQNA - Toleo la kwanza la Mashindano ya Kimataifa ya Qur'ani ya Iraq, ambayo ni maarufu kama Tuzo ya Kimataifa ya Qur'ani ya Iraq, yameanza Jumamosi huko Baghdad, kwa kushirikisha washindani, majaji, na maafisa wa Iraqi.

 Akihutubia katika hafla hiyo, Waziri Mkuu wa Iraq, Mohammed Shia' Al-Sudani amesema kuwa kukuza maadili ya uvumilivu, amani, na upendo, bila ya chuki za kidini na kikabila, kunawawezesha Wairaqi kushinda changamoto, na kuwahimiza kufuata mafundisho ya Qur'ani katika kueneza huruma na kuhifadhi taifa umoja.
Serikali inaunga mkono maqari na wahifadhi wa Qur'ani na inapanga kuanzisha njia maalum ya kuwaingiza wanaharakati wa Qur'ani katika vyuo vikuu, aliongeza.
Iraq pia  imejitolea kusimamia na kuunga mkono vituo vya Qur'ani, kutoa msaada kwa shule, taasisi na vyuo vikuu vinavyofanya mikusanyiko ya Qur'ani, alisisitiza.
Katika sehemu nyingine ameashiria ukatili unaofanywa na Israel katika eneo la Asia Magharibi na kusema: "Mauaji ya kimbari yanafanyika katika eneo letu dhidi ya watu wa Palestina na Lebanon huku kukiwa na ukimya wa kimataifa." Alitoa wito wa kusitishwa mara moja vita vya kikatili vya Israel ambavyo vimeua zaidi ya watu 46,000 huko Gaza na Lebanon tangu Oktoba mwaka jana.
Mashindano hayo yatakamilika Novemba 14.
Kabla ya hapo Raef Al-Amiri, mkurugenzi wa Kituo cha Kitaifa cha Sayansi ya Qur'ani nchini Iraq na mjumbe wa Kamati Kuu ya Kuandaa Mashindano alisema kuwa mashindano hayo yanawakilisha mpango wa kwanza wa ngazi ya serikali wa aina yake nchini Iraq.
Ameongeza kuwa, wahifadhi na qari 31 kutoka nchi za Kiarabu na Kiislamu wanashiriki katika toleo hili la mashindano hayo.
Afisa huyo wa Iraq alisema kuwa lengo kuu la mashindano hayo ni kuangazia turathi za Qur'ani za Iraq na kuhimiza usomaji na kuhifadhi Qur'ani.
Al-Amiri amesisitiza kuwa mashindano hayo yatajumuisha kategoria za kisomo na kukariri, kila moja ikiwa na vigezo vyake vya kuhukumu.
Amefafanua kuwa shindano hilo litafanyika kwa hatua mbili: hatua ya awali itashirikisha washiriki wote, wakati hatua ya pili itapunguza uwanja hadi washiriki watano bora.
Kwa mujibu wa mkurugenzi wa Kituo cha Kitaifa cha Sayansi ya Qur'ani Iraq, washindi watatunukiwa zawadi zenye thamani, na mashindano hayo yatafanyika chini ya kauli mbiu ya, “Kutoka Baghdad, Nembo ya Ustaarabu na Uislamu, hadi Gaza, Nembo ya Muqawama, na Lebanoni, Nembo ya Jihadi; Kupitia Qur’ani, Tunapata Ushindi na Uthabiti.” 

3490623