Kubeba kadi ya Nusuk katika Hija ni wajibu; Je, ikipotea ufanyeje?

IQNA – Kubeba kadi ya Nusuk ndani ya Saudi Arabia ni sharti kwa walio katika safari ya Hijja kwani ina taarifa muhimu. Lakini itakuwaje iwapo atapoteza?

Mamlaka za Saudi Arabia zimeeleza hatua ambazo Mahujaji wanapaswa kuchukua iwapo watapoteza kadi yao ya lazima ya utambulisho wakati wa ibada ya Hija ya kila mwaka.

Wizara ya Hija na Umrah ya Saudi Arabia imesema kuwa iwapo kadi ya Nusuk itapotea, hujaji anapaswa mara moja kumjulisha kiongozi wa kundi lake, kisha atumie toleo la kidijitali la kadi hiyo anaposafiri, na kutoa taarifa ya kupotea kwa afisa wa usalama aliye karibu.

Usaidizi pia unaweza kupatikana kwa kupiga simu 1966 au kwa kutembelea Kituo cha Huduma kwa Wageni wa Allah au matawi ya Kituo cha Huduma za Nusuk yaliyo karibu na Msikiti Mkuu huko Makka, mahali patakatifu zaidi katika Uislamu.

Kufuata hatua hizi kutahakikisha hujaji anaendelea kupata huduma na kuzunguka kwa uhuru katika maeneo matakatifu, wizara imeeleza.

Kadi ya Hija ya Nusuk ni hati rasmi inayotofautisha Mahujaji waliosajiliwa rasmi na wale wanaotekeleza ibada ya Hija kinyume cha sheria za nchi.

Ina taarifa muhimu kama vile mahali alipopangiwa hujaji katika Makka, Madina, na maeneo mengine matakatifu, pamoja na maelezo ya mawasiliano ya kampuni inayomhudumia.

Kadi hiyo pia huhifadhi historia ya kiafya ya hujaji, ikisaidia katika mwongozo na huduma za dharura, na kupunguza hatari ya mtu kupotea.

Kadi hizo, zilizochapishwa kwa vipengele vya usalama wa hali ya juu, zimeundwa kuzuia wizi na kuthibitisha hali halali ya hujaji.

Mahujaji kutoka nje ya nchi hupokea kadi hizo wanapowasili, huku mahujaji wa ndani wakizipata kutoka kwa kampuni zinazohudumia kabla ya kuanza kwa Hija.

3492980