Hija ya 1446: Kundi la kwanza la wanaotekeleza ibada ya Hija lafika Madina

IQNA – Uwanja wa ndege wa kimataifa katika mji mtakatifu wa Madina ulipokea kundi la kwanza la waumini wanaotekeleza ibada ya Hija ya  mwaka huu wa 1446 (2025) siku ya Jumanne. 

Kundi hili la kwanza la wanaotekeleza ibada ya Hija lilifika Uwanja wa Ndege wa Kimataifa wa Prince Mohammed bin Abdulaziz jana. 

Waumini hao walikaribishwa kwa mfumo ulioandaliwa kikamilifu, uliokusudiwa kuwapa huduma za kipekee kuanzia pale walipowasili. 

Jumla ya watu 262 kutoka Hyderabad, India, walipokelewa na maafisa kadhaa waliowakaribisha kwa shada za maua na zawadi za kumbukumbu. Taratibu za kuingia zilifanyika kwa ufanisi mkubwa na bila shida yoyote, kutokana na juhudi za pamoja za taasisi mbalimbali zinazofanya kazi katika uwanja wa ndege. 

Mamlaka zote zinazohusika na kuhudumia Mahujaji zimeanza kutekeleza mipango yao ya uendeshaji ili kuhakikisha kuwasili  kwa waumini wanaokusudia kutekeleza ibada ya Hija kunafanyika kwa urahisi na kuwapokea katika makazi yao yaliyotayarishwa vizuri mjini Medina. 

Hija ni ibada ya kwenda katika mji mtakatifu wa Makka ambayo kila Mwislamu mwenye uwezo wa kiafya na kifedha analazimika kuitekeleza angalau mara moja katika maisha yake. 

Ibada hii ya kila mwaka inachukuliwa kama moja ya nguzo tano za Uislamu na kitendo kikubwa zaidi cha ibada ya pamoja ulimwenguni. Pia ni ishara ya umoja wa Waislamu na kujisalimisha kwao kwa Mwenyezi Mungu. 

3492888