Wageni Milioni moja watembelea Kiwanda cha Kuchapisha Qur’an Madina Mwaka 2025

IQNA – Kiwanda cha Mfalme Fahd cha Kuchapisha Qur’an kilichoko mjini Madina, Saudi Arabia, kilipokea wageni wapatao milioni moja kutoka ndani na nje ya nchi mwaka uliopita.

Kiwanda hiki ni miongoni mwa vivutio vikuu kwa mahujaji wanaotembelea Madina, na mwaka 2025 wageni hao walipata fursa ya kushuhudia juhudi za kuhudumia Qur’an Tukufu kwa kuchapisha na kusambaza nakala zake katika lugha mbalimbali za dunia.

Kiwanda cha Mfalme Fahd, kilichoanzishwa mwaka 1984, ndicho kituo kikubwa zaidi duniani cha kuchapisha na kusambaza Qur’an. Kinazalisha takribani nakala milioni 10 kila mwaka, zikiwemo tafsiri kwa lugha kama Kiingereza, Kiindonesia, Kirusi, Kiswahili, Kijapani, Kifarsi, Kiurdu, Kibengali na Kikorea.

Dhamira kuu ya kituo hiki ni kuchapisha na kusambaza Qur’ani kwa mujibu wa qira’a za Mutawatir zinazothibitishwa na wanazuoni wa Kiislamu na watafiti wa Qur’an. Baada ya mwandishi wa hati kuandaa nakala ya awali, maandiko hukaguliwa kwa umakini, herufi kwa herufi na neno kwa neno, yakilinganishwa na nakala iliyothibitishwa.

Mfumo wa usimamizi wa uchapishaji unahusisha hatua kadhaa, kuanzia ukaguzi wa awali na usimamizi, hadi ufuatiliaji wakati wa uchapaji na ukaguzi wa sampuli za mwisho.

Aidha, nakala za kidijitali na sauti za Qur’an zinapatikana kwa wanaohitaji kupitia majukwaa ya kielektroniki na programu za kisasa.

3495989