Maelfu ya wafanyaziara waomboleza huko Karbala katika Maadhimisho ya kufa shahidi Bibi Zahra (SA)

IQNA - Maelfu ya wafanyaziara walikusanyika huko Karbala, Iraq siku ya Alkhamisi kuomboleza katika kumbukumbu ya kuuawa shahidi Bibi Zahra (SA), binti yake Mtume Muhammad (SAW).

Barabara zinazoelekea kwenye Haram Tukufu ya Imam Hussein (AS) na Hadhrat Abbas (AS), pamoja na milango ya zamani ya kuingia katika mji wa Karbala, zilijaa wafanyaziara kutoka Iraq na nchi nyingine, waliokuja kutoa heshima zao.

Watumishi wa mahali patakatifu pia walishiriki katika sherehe za maombolezo. Tukio hilo lilianzia katika uwanja wa madhabahu ya Abbasi, ambapo watumishi hao walitembea umbali kati ya makaburi hayo mawili wakiwa na huzuni na kuimba nyimbo za heshima, kabla ya kuwasili katika Haram ya Imam Hussein (AS) kuendelea na maombolezo yao.

Madhabahu takatifu yalitoa usalama, huduma za afya, chakula, maji ya kunywa, na mahitaji mengine ili kukidhi mahitaji ya mahujaji.

Aidha Idara ya Mfawidhi wa Haram ya Hadhrat Abbas (AS) ilisambaza takriban milo 9,000 kwa wafanyaziara huko Karbala.

3479862

Seyyed Alaa Abdul-Hussein, mkuu wa kitengo cha ukarimu katika idara hiyo amesema kuwa wafanyakazi walitoa huduma maalum kwa wafanyaziara na kusambaza milo katika maeneo kadhaa.

Aliongeza kuwa kituo cha usambazaji nje ya Haram, karibu na Lango la Baghdad, kilifunguliwa, ambapo milo 5,000 ya chakula cha mchana na chakula cha jioni ilisambazwa.

Ndani ya kumbi, takriban milo 4,000 ilisambazwa.