Mashindano makali katika Mpango wa Qur’ani wa ‘Dawlat al-Tilawa’ nchini Misri

IQNA – Katika vipindi vipya vya shindano la vipaji vya Qur’ani nchini Misri linaloitwa “Dawlat al-Tilawa” , washiriki walionyesha uwezo wao wa kusoma na kuhifadhi aya za Qur’ani Tukufu.

Vipindi vya saba na nane vya kipindi hiki maarufu vilirushwa hewani siku ya Ijumaa na Jumamosi, kwa mujibu wa gazeti la Ad-Dustour.

Mashindano ya kipindi cha saba yalihusisha washiriki sita: Reza Muhammad Reza, Muhammad Ahmed Hassan Ismail, Ashraf Saif Saleh, Walid Salah Attiyah, Muhammad Maher Shafiq na Mahmoud Al-Sayyid Abdullah. Baada ya matokeo ya awali, Ridha Muhammad Ridha na Walid Salah Attiyah walichuana kuamua nani angeendelea na nani angeondolewa. Hatimaye, majaji walimteua Ridha Muhammad Ridha kuendelea katika raundi inayofuata.

Jopo la majaji lilihusisha Sheikh Hassan Abdel Nabi, Naibu Mwenyekiti wa Kamati ya Masomo ya Qur’ani Tukufu katika Al-Azhar; Taha Abdel Wahab, mtaalamu wa sauti na maqamat; Mustafa Hassani, mhubiri wa Kiislamu; na Sheikh Taha Al-Numani, msomaji mashuhuri wa Qur’ani.

Kipindi pia kilihusisha wageni mashuhuri akiwemo Waziri wa Awqaf wa Misri Osama Al-Azhari; Mufti Mkuu wa Misri Nazir Mohamed Ayyad; mwanachama wa Baraza la Wanazuoni Wakuu wa Al-Azhar Ali Juma; pamoja na masheikh mashuhuri kama Ahmed Ahmed Nuaina, Abdel Fattah al-Tarouti, Jaber al-Baghdadi; na wasomaji wa kimataifa Mohamed Ayoub Asif kutoka Uingereza na Omar Al-Qazabari, Imam wa Msikiti wa Hassan II nchini Morocco.

Washiriki wa kipindi cha nane walikuwa Atiyaullah Ramadan, Ahmed Jamal Abdul Wahab, Muhanna Rabi Abdul Mun’im, Ali Muhammad Mustafa, Muhammad Kamel na Omar Nasser Ahmed Ali. Kama ilivyokuwa katika vipindi vitatu vilivyopita, kulikuwa na mchujo mpya ambapo washiriki watano waliendelea na mmoja akaondolewa. Sheikh Youssef Halawa alikuwa mgeni maalum wa kipindi cha nane.

Sheikh Hassan Abdel Nabi alimsifu sana Ali Muhammad Mustafa Abdel Rahim, mwanafunzi wa miaka 14 kutoka Dakahlia, anayesoma mwaka wa tatu katika Shule ya Maandalizi ya Al-Azhar na anayesoma kwa riwaya ya Hafs kutoka Asim. Sheikh Abdel Nabi alisema kuwa usomaji wake ulikuwa bora mno na kwamba alivutwa kabisa na akatamani usomaji huo usiishe.

Washiriki hupimwa kwa ustadi wa Tajwid, ufuataji wa kanuni za usomaji na Lahn (intonation). Wawili bora zaidi huingia katika fainali ambapo jopo la majaji huamua mshindi. Shindano lilianza na washiriki 32, na idadi hupungua kila kipindi kwa mchujo, hadi washindi wa sehemu mbili , Usomaji na Tajwid , watakapobainika.

Washindi wa kwanza katika kila kipengele watapokea zawadi ya paundi milioni moja. Aidha, Qur’ani nzima itarekodiwa kwa sauti zao na kurushwa kupitia kituo cha Misr Qur’an Karim. Watapewa pia heshima ya kuongoza Swala za Taraweeh katika Msikiti wa Hussein katika mwezi mtukufu wa Ramadhani ujao.

3495679