Watazamaji zaidi ya milioni 168 wa kipindi cha Qur'ani cha “Dawlet El Telawa” Misri

IQNA – Kipindi cha televisheni cha Qur’ani Tukufu nchini Misri, “Dawlet El Telawa”, kimepata mafanikio makubwa baada ya kurushwa sehemu nne pekee.

Jumla ya watazamaji kupitia majukwaa ya kidijitali ya vituo vya CBC na Al-Hayat imevuka zaidi ya milioni 168. Kipindi hiki, kinachorushwa kupitia Al-Hayat, CBC, al-Nas na jukwaa la Watch It, kimekuwa gumzo kubwa mitandaoni, kikivutia mijadala na pongezi nyingi.

Dawlet El Telawa imefanikiwa kufufua sanaa ya usomaji wa Qur’ani Tukufu kwa namna inayoheshimu hadhi yake ya kidini na urithi wake halisi wa Kiislamu, na hivyo kupanua hadhira yake ndani na nje ya Misri. Kipindi hurushwa kila Ijumaa na Jumamosi saa tatu usiku, kikitoa jumla ya zawadi ya pauni milioni 3.5.

Washindi wa kwanza katika mashindano ya tilawa na tajwid watapokea pauni milioni moja kila mmoja, na Qur’ani nzima itarekodiwa kwa sauti zao na kurushwa kupitia kituo cha Misr Qur’an Karim.

 Aidha, washindi watapewa heshima ya kuongoza swala za Taraweeh katika Msikiti wa Imam Hussein mwezi mtukufu wa Ramadhani ujao. Jopo la majaji linajumuisha wanazuoni mashuhuri wa Kiislamu akiwemo Hassan Abdel-Nabi, Taha Abdel-Wahab, Mostafa Hosny na Taha Al-Nuamani. Wageni maalum ni pamoja na Osama al-Azhari, Nazir Mohamed Ayyad, Ali Gomaa, Ahmed Na’ina, Abdel-Fattah al-Tarouti, Jaber al-Baghdadi, mwanazuoni wa Uingereza Muhammad Ayoub Asif, na Omar al-Qazabri kutoka Morocco.

/349552