Wapalestina wa Gaza wapata Tuzo Kuu ya Kiislamu Duniani
Muslim News Nigeria imetaja Watu wa Gaza kuwa washindi kwa pamoja wa tuzo ya mwaka 2024/2025, ikieleza ustahimilivu wao wa kipekee katika kukabiliana na mashambulizi yanayoendelea.
Tangazo hilo lilitolewa Ijumaa, Novemba 28, na Rasheed Abubakar, mchapishaji wa Muslim News Nigeria, na ni mara ya kwanza heshima hiyo kutolewa kwa idadi ya watu wote. Heshima hiyo ni kumbukumbu kwa walionusurika na maelfu waliouawa tangu kuanza kwa vita vya Israel dhidi ya Gaza.
Abubakar alisema uamuzi huo ni “wa kipekee lakini wa lazima,” akibainisha kuwa Watu wa Gaza wameonyesha ustahimilivu na imani isiyotikisika licha ya mabomu, uhamisho na upungufu wa chakula, maji na dawa. Aliongeza kuwa tuzo hiyo ni wajibu wa kimaadili wa kusikiza na kutangaza sauti za waliodhulumiwa. Heshima hiyo pia inawatambua waandishi wa habari, madaktari, walimu, wahudumu wa misaada na raia wengine waliouawa katika vita, wakiwemo watoto, na imewasifu waliobaki kuendelea kufundisha, kuripoti au kusaidia jamii baada ya kupoteza ndugu au makazi.
Katika hotuba yake, Abubakar ametoa wito kwa viongozi wa dunia na mashirika ya kimataifa kuongeza juhudi za kufanikisha amani ya haki na ya kudumu Palestina. Pia amezitaka serikali na taasisi za Kiislamu kuongeza msaada wa kibinadamu kwa Gaza, akisisitiza kuwa mshikamano lazima uonekane kwa vitendo.
Pamoja na tangazo kuu, Muslim News Nigeria imetaja washindi kadhaa wa kimataifa katika makundi mbalimbali. Mpiga picha mkongwe wa Kipalestina na mpiga kamera wa TRT Arabi, Sami Shehadeh, alitajwa kuwa Mtu wa Habari wa Kiislamu Duniani kwa Mwaka. Shehadeh alipoteza mguu katika shambulio la kifaru cha jeshi la Israel mwaka 2024 lakini baada ya upasuaji nchini Uturuki, alirudi tena kuripoti mstari wa mbele. Heshima yake inaakisi ustahimilivu na kujitolea, ikionyesha azma ya waandishi wa habari wanaoendelea kuandika ukweli wa Gaza chini ya hatari kubwa.
Katika kundi la afya, daktari wa upasuaji wa Kipalestina-Britania, Ghassan Abu Sittah, ametunukiwa kwa kazi yake ya kibinadamu ya kitabibu Gaza. Mchezaji wa kandanda wa Ufaransa, Ousmane Dembélé, ametambuliwa katika kundi la umaarufu kwa mafanikio yake ya michezo na mshikamano wake wa wazi na Wapalestina. Msomi Ziyaad Mahomed ametunukiwa katika kundi la fedha kwa mchango wake katika fedha za kijamii za Kiislamu, huku mwalimu wa Kipalestina, Naglaa Weshah, akitambuliwa katika kundi la elimu kwa kuendelea kufundisha watoto waliopoteza makazi Gaza.
Shirika rasmi la misaada la Uturuki, TİKA, limetajwa kuwa Shirika la Kibinadamu la Kiislamu Duniani kwa Mwaka kwa msaada wake mpana kwa jamii dhaifu katika zaidi ya nchi 170. Shirika hilo limeangaziwa kwa msaada wake wa dharura Gaza; kuanzia chakula na dawa hadi ujenzi wa awali chini ya mzingiro—na limeelezwa kuwa mfano wa mshikamano wa Kiislamu duniani. Qatar Airways imetambuliwa kama chapa bora ya Kiislamu kwa ubora wa huduma na mchango wake katika safari za Hija na Umrah. Sheikh Yasir Qadhi ametunukiwa Tuzo ya Huduma ya Maisha kwa miongo ya mchango wa kielimu na kijamii, huku mwanaharakati wa Afrika Kusini, Dkt. Fatima Hendricks, akiheshimiwa katika kundi la utetezi kwa juhudi zake za haki na amani, ikiwemo kupinga jinai za Israel dhidi ya Gaza.
Sasa ikiwa katika toleo lake la tano (#MNAwards), tuzo hizi zinalenga kuonyesha ubora wa Kiislamu duniani, hususan kwa watu na taasisi zinazounga mkono jamii za Kiislamu zilizodhulumiwa. Utambuzi wa Watu wa Gaza unasimama kama ushahidi wa nguvu ya ustahimilivu, imani na roho ya jamii inayokabiliana na mzingiro.
3495547
