Hilali ya Shawwal haikuonekana; Iran kuadhimisha Eid al‑Fitr Jumamosi

IQNA – Iran itaadhimisha Eid al‑Fitr siku ya Jumamosi, tarehe 21 Machi, baada ya hilali ya mwezi wa Shawwal kutoonekana nchini humo jioni ya Alhamisi.

Kamati ya Istihlal (uangalizi wa hilali) ya Ofisi ya Kiongozi wa Mapinduzi ya Kiislamu ilitangaza taarifa hiyo usiku uliopita.

Kwa mujibu wa kamati hiyo, kutokana na kutokuonekana kwa hilali wakati wa machweo ya jua siku ya Alhamisi, Ijumaa itakuwa siku ya mwisho ya mwezi mtukufu wa Ramadhani, na Jumamosi itakuwa siku ya Eid al‑Fitr.

Baadhi ya wanazuoni wa dini hutegemea hesabu za kielimu za anga kubainisha mwanzo wa miezi ya Kiislamu, ilhali wengi wao wanaamini kuwa kuonekana kwa hilali kwa macho ndiko kunakopaswa kutegemewa katika kuthibitisha mwanzo wa mwezi.

Ramadhani ni mwezi wa tisa na ulio mtukufu zaidi katika kalenda ya Kiislamu, ambapo Waislamu hukumbuka kuteremshwa kwa Qur’ani Tukufu kwa Mtume Muhammad (S.A.W.).

Katika mwezi wa Ramadhani, Waislamu hufunga kuanzia alfajiri hadi machweo ya jua, wakijiepusha na kula, kunywa na kuvuta sigara.

Pia hujitolea zaidi katika ibada, sadaka na matendo mema, wakilenga kuimarisha imani yao na kutakasa nafsi zao.

Mwisho wa mwezi wa Ramadhani na kuanza kwa mwezi wa Shawwal, Waislamu huadhimisha sikukuu ya Eid al‑Fitr.

3496828/