Mashindano ya Qur’ani ya Sultan Qaboos ya Oman: Hatua ya awali yaanza kwa kishindo
Tukio hili takatifu, ambalo lilianza kupamba moto Jumapili, linashuhudiwa kama chachu ya kuimarisha imani na uhusiano wa dhati kati ya vijana na Qur'ani Tukufu, likiwa na lengo kuu la kuzindua nuru ya kiroho ndani ya nyoyo za washiriki.
Mashindano haya, yanayosimamiwa kwa ufanisi na Kituo cha Juu cha Sultan Qaboos cha Utamaduni na Sayansi (SQHCCS) chini ya usimamizi wa Diwani ya Ikulu ya Kifalme, hayalengi tu ushindani wa kidunia, bali yamejikita katika kuimarisha maadili ya kiroho, kukuza vipaji vya kusoma na kuhifadhi Qur’ani, na kuleta umoja miongoni mwa Ummah. Ni hatua muhimu katika kuenzi nafasi adhimu ya Qur’ani Tukufu na kuwalea vijana wetu katika misingi imara ya kuisoma na kuizingatia vyema kalamu ya Allah.
Muundo wa mashindano haya umegawanywa katika viwango saba mahususi ili kuhakikisha ushindani wa haki na wa kina. Kiwango cha kwanza kinahusu hifdhi ya Qur’ani Tukufu nzima, huku viwango vinavyofuata vikizingatia uhifadhi wa sehemu zinazofuatana: juzuu 24 kwa kiwango cha pili, juzuu 18 kwa kiwango cha tatu, na juzuu 12 kwa kiwango cha nne ambapo washiriki sharti wawe wamezaliwa mwaka 2001 au baadaye. Vilevile, viwango vya tano, sita, na saba vinahusu hifdhi ya juzuu sita, nne, na mbili mtawalia, kwa washiriki waliozaliwa kuanzia miaka ya 2012, 2016, na 2019.
Kamati ya majaji imejipanga kikamilifu kuwatembelea washiriki katika vituo 28 tofauti vilivyotapakaa katika mikoa ya Oman. Mwaka huu, juhudi hizi zimepanuka zaidi kwa kuongezwa kwa vituo viwili vipya katika wilaya za Al Jabal Al Akhdhar na Dima W’attayeen, hatua inayoashiria ukuaji na mwamko wa Qur’ani katika eneo hilo. Ikumbukwe kuwa mchakato wa usajili kwa toleo hili la 34 ulihitimishwa mnamo Julai 7, 2026, baada ya kuanza tarehe 21 Aprili, 2026.
3498498
