Ni lini uchapishaji wa Qur’ani ulianza nchini Ujerumani?
Kwa mujibu wa tovuti ya Muslims Around the World, kujifunza historia ya uchapishaji wa Qur’ani barani Ulaya ni jambo muhimu sana kwa kuelewa mwanzo wa ari ya Magharibi kuhusu Uislamu na Qur’ani Tukufu, na jinsi Watafiti wa Mashariki (Mustashrikin) wa awali walivyoishughulika Qur’ani kuanzia utafiti wa kisayansi hadi katika upotoshaji uliokusudiwa.
Katika muktadha huu, Dkt. Amin Al‑Qasim, mtafiti maalumu wa historia, ameandika utafiti wa kina unaonyesha hatua kuu zilizojitokeza katika uchapishaji wa Qur’ani na Wajerumani tangu karne ya 17, akieleza sifa za nakala hizo pamoja na maoni na makosa yaliyopatikana.
Wanazuoni wa Kijerumani walionyesha hamu ya kujifunza Uislamu na Qur’ani Tukufu kwa muda mrefu. Kwa sababu hiyo, kuanzia karne ya 17, waliichapisha Qur’ani nchini mwao ili kurahisisha masomo na tafsiri yake.
Abraham Henkelmann (1652‑1695), mtawa wa Kiprotestanti wa Kijerumani na mwalimu wa chuo kikuu, alichapisha nakala ya Qur’ani Tukufu mjini Hamburg mwaka 1694. Nakala hii inachukuliwa na wanazuoni wengi kuwa ndiyo Qur’ani kamili ya kwanza iliyochapishwa kwa lugha ya Kiarabu barani Ulaya. Haikufasiriwa, ila ilikuwa na maelezo ya pembeni kwa Kiingereza.
Nakala hii ilikuwa na kurasa 560, kila ukurasa ukiwa na kati ya mistari 17 hadi 19. Utangulizi wa nakala hii ulieleza kuwa lengo la uchapishaji wake lilikuwa ni kukuza ufahamu juu ya lugha ya Kiarabu na dini ya Uislamu.
Hata hivyo, nakala hii haikuwa haina makosa na upotoshaji: kuanzia kwenye kichwa cha kitabu, utangulizi wake na zaidi. Kulikuwa na makosa ya tahajia na alama za maandiko, aya zilizokosekana, pamoja na makosa katika majina ya sura.
Licha ya hayo, nakala hii inabakia mojawapo ya za zamani zaidi zinazojulikana, na nakala kadhaa zipo, moja ikiwa imehifadhiwa katika Kituo cha Utafiti na Masomo ya Kiislamu King Faisal kilichopo Riyadh, Saudi Arabia.
Gustav Lebrecht Flugel (1802‑1870), mwanataaluma wa Kijerumani katika masomo ya Mashariki, alichapisha toleo jipya la Qur’ani Tukufu kwa mara ya kwanza mwaka 1834, likichapishwa na kampuni ya Tauchnitz mjini Leipzig, Saxony, Ujerumani.
Flugel alichapisha tena Qur’ani hii mara ya pili mwaka 1837, na mara ya tatu mwaka 1841 baada ya kufanya marekebisho fulani.
Kulingana na nakala hii, mwaka 1842 alichapisha kitabu kilichoitwa Nyota za Furqan Pembeni mwa Qur’ani, kilichoonyesha orodha ya mada za maneno ya Qur’ani Tukufu kwa Kilatini. Flugel aliirudia tena Qur’ani hii mwaka 1849, 1858, na 1869.
Inapaswa kutajwa kuwa toleo la Leipzig kwa ujumla lilikuwa zuri na lilienezwa sana miongoni mwa wanazuoni wa Ulaya. Hata hivyo, kulikuwa na maelezo ya kitaalamu kuhusu dosari zake, ikiwemo kuvunja kanuni za tahajia za Kiosmaniya, kutegemea aina nyingi za usomaji katika nakala moja, pamoja na makosa katika kuhesabu aya na kugawanya sura, na mengineyo.
3494719
